Веста за убиството на 18-годишното момче Ангел донесе немирна вечер во скопско Ѓорче Петров. Екипата на НОВА ја помина вечерта таму следејќи ги обидите на полицијата да воспостави ред и мир откако разгневена толпа граѓани кои спонтано се собраа својот гнев го истурија врз околните дуќани и контејнери.
Сите влезови во Ѓорче Петров беа затворени цела ноќ од трговскиот центар „Планет“ па се до Ѓорче 2 каде што и се случи убиството. Домот на семејството на Ангел беше тивок некаде по полноќ. Соседите вознемирано раскажуваат дека во моментот на нашето пристигање родителите на Ангел давале исказ во полициската станица, а тие се труделе да одржат мир во и околу куќата бидејќи дедото на Ангел кој бил стар и болен не знаел се уште ништо.
-Детето умре пред очите на татко му, што да ви кажеме, има ли пострашно. Ве молиме бидете тивки, нека не чуе и нека не дознае се уште дедото, тие ќе му кажат кога ќе биде потребно, одговорија соседите во чиј дом во моментот беше и 12-годишниот брат на Ангел кој се уште не знаел што точно се случило со брат му.
Ако пред домот на Ангел не дочека тешка тишина, на главната улица во Ѓорче Петров беше бурно и немирно. НОВА сведочеше на моментот кога полицијата со жив штит извади група граѓани од албанска националност кои беа заклучени во обложувалница.
-Ќе ги истепаа, си знаат. Затоа се заклучија. Тие се сопственици на слаткарница, вели еден од собраните граѓани.
Мешани коментари се слушаа од толпата. Едни извикуваа „Така им треба, нека ги истепаат„ или „Каде се нас да не бранат, види за нив што прават да ги спасат“, додека други велеа „Што се тие криви, си имаат слаткарница со години овде па не ви сметале“. Едни повикуваа на разум додека се палеа и кршеа дуќани на граѓани од муслиманска вероисповест, додека други не можеа да го контролираат гневот.
НОВА сведочеше и на палењето на кафеаната „Планета“, исто така во сопственост на граѓанин од муслиманска вероисповест. Пожарна и полиција повикаа соседите Македонци.
-Сефо доаѓај жити бога ти ја запалија кафаната. Се гори, оф леле, извикуваше сосетката Македонка додека другите соседи влечеа црева и кофи со вода за да помогнат дури да дојде пожарната.
Ѓорче Петров беше буквално опколено со полиција. Во неколку наврати сведочевме на куси судири помеѓу толпата граѓани и полицијата. Запалени контејнери и превртени автомобили беа „декор“ долж целата главна улица во Ѓорче Петров. Откако градоначалникот Сокол Митревски неуспешно се обиде да ги смири тензиите, ноќта по полноќ пристигна и директорот на ДБК Сашо Мијалков. Се задржа кратко, а веднаш по неговото заминување толпата се разотиде, а и полицијата почна полека да се повлекува.
18-годишниот Ангел загина откако крадци влегле да му го крадат велосипедот во дворот. Тој и татко му ги забележале крадците и тргнале по нив. Кај болницата Св. Лазар Ангел успеал да стигне еден од крадците кој го прободел со нож во градите. Ангел умред пред очите на таткото. Телото на Ангел 5 часа лежело на скалите на очната болница додека траел увидот. Пред болницата и денеска се уште има полиција. Еден од осомничените, според МВР е приведен и го признал убиството.