Репортерот на НОВАТВ Сашка Цветковска тргна по трагите на живеалиштетот на поранешниот шеф на тајната полиција, Сашо Мијалков, откако вечерва министерот Оливер Спасовски обелодени дека истражителот на СЈО по наредба на обвинителство на Марко Зврлевски бил приведен и однесен во П.С. Беко додека фотографирал објект за којшто се сомневале дека во него престојува токму Сашо Мијалков. Претходно, обвинителката Катица Јанева беше во полициската станица од каде што, како што рече „дошла да си го земе назад истражителот, по што замина во УБК.
Извори во МВР ја посочија улицата на скопската населба Водно, Салвадор Аљенде, како местото каде што се наоѓа зградата каде што живее Мијалков. Повеќе извори упатуваат дека станува збор за зградата со број 69. Но, до објавувањето на оваа сторија, НОВА не можеше да добие потврда дали тоа навистина е бројот 69 или друг број на таа улица. Екипата на НОВА сведочи дека сите згради на оваа тесна улица која се наоѓа на височинка и во пријатна тишина и зеленило со поглед одгоре кон Скопје, може да се наречат луксузни или со други зборови, „обични смртници“ не би можеле да сонуваат да престојуваат овде. Зградата број 69, но и речиси сите згради во соседството каде што престојува Мијалков, се обезбедувани од компанијата СГС, компанија која своевремено неделникот „Фокус“ ја поврзуваше токму со Сашо Мијалков. Две куќи подолу од бројот 69 , во друга зграда обезбедувана од Агенцијата СГС, екипите го забележаа чуварот на зградата, кој излезе на улицата и со поглед испитуваше што прават тука новинарите. Камерите го регистрираа како телефонира и по неколку минути возила на СГС со силна брзина пристигнаа и ја опколија зградата со број 69 . Тогаш екипите си заминаа од тоа место.