Снимател: Трајче Антоновски
Монтажа: Дарко Груески

Пробивањето кон населените места Стајковци, Сингилиќ, Арачиново и околните села, по невремето кое ги зафати, и понатаму оди тешко. Обиколницата и понатаму е предмет на теренски расчистувања, а сликата на превртени автомобили и поплавено земјиште доловува што се случувало таму кризната вечер кога се наталожи огромна количина на дожд.

На влезот кон Стајковци од едната страна полицијата го редуцира сообраќајот поради багерите кои чистат, од другата и понатаму протекува вода.

poplavi 08 08 2016Жителите на овој регион се во паника, бес и истоштеност. Од своите домови постојано вадат кал и тиње, а од надлежните кои постојано се во посета, бараат активност.

Некои од улиците воопшто и не се поминуваат со автомобил. Чизмите, тракторите и теренските возила се единствениот начин да се стигне до нив.

Премиерот Емил Димитриев на локалното население му соопшти дека наредната недела се ослободени од своите работни места за да се посветат на личните проблеми, но и дека надлежните работат на утврдување на штетите.

А штетите се огромни. Заобиколувајќи го подрачјето околу Стајковци, се забележува дека земјопоседниците годинава речиси сигурно ќе го изгубат родот.

На овој регион ќе му треба време да се врати во нормално живеење, но како што велат мештаните, засега, животот продолжува.

Она што Македонија во моментов може да го направи за најпогодените е да донира на телефонскиот број 143 400 и во пунктовите за донација низ Македонија.