Размената на деловни простории меѓу Јавното претпријатие Комунална хигиена и фирмата Унитајарс, беше едно од прашањата за кое се водеше на денешната седница на Советот на Град Скопје.
Советникот од СДСМ, Дамјан Манчевски, го праша градоначалникот Коце Трајановски дали требало во ова време да се склучи овој како што рече сомнителен договор, според кој Комунална хигиена на сопственикот на Унитајарс, треба да му доплати скоро 4 милиони евра, а Градското Собрание не дава ни денар за поплавените граѓани.
Трајановски не сакаше да одговори на прашањето, само кусо рече дека од градската каса нема да се одлеат пари, туку тие ќе биле од буџетот на Комунална хигиена и говорницата му ја препушти на директорот на градското претпријатие, Ракип Дочи.
Дочи трампата на атрактивниот имот во центарот на Скопје, со старата зграда во кругот на фабриката ФАС 11 октомври, ја правда дека била вековен сон на сите вработени во претпријатието. Комунална хигиена била формирана во 1906 година, а дури сега по 110 години, сите вработени ќе биле на едно исто место.
„99 отсто од вработените ќе бидат задоволни од овој договор, а само неколку манекени и манекенки нема да бидат среќни, зошто ќе им недостасуваат Тренд и Ла тераца во центарот на Скопје и ќе се оддалечат 1,5 километри подалеку. И јас со тоа го губам мојот комодитет, но тоа не е приоритет во овој момент, приоритет е квалитетот на услугите кои им ги нудиме на граѓаните“, изјави Дочи.
Во продолжение погледнете во видеото дел од дебатата на оваа тема.