Група новинари од различни редакции и членови на Новинарскиот Пленум денеска одржаа мирен протест пред Комисијата за верификација на факти поради информациите за лустрирање на новинарката Јадранка Костова, која е прва прогрласена за соработник на службите.
Со транспаренти „Комисија за верификација на нарачките“, „Фрустрациска комисија“, „Новинарсвото во ендек“, „ФРИДОМ ХАОС“, новинарите порачаа дека крајната намера на лустраторите е да стават крај на професионалното новинарство.
На прием кај претседателот на Комисијата за верификација на факти Томе Аџиев денеска беа новинарите Оливера Трајковска, Драган Антоновски, Борјан Јовановски и Мухамед Зекири. Тие добиле одговор од Аџиев дека лустрацијата е според законот.
-За нас во Лустрациската комисија средбата беше без никакво изненадување. Се е според законот, вели Томе Аџиев. На сите наши прашања дали воопшто ја разбираат суптилноста во новинарската професија и што тоа во нивните докази во Државниот архив може да биде заведено од комуникациите на новинарите поради суптилнопста на работите, со различни сфери на интересирања, одговор за господин Аџиев е се е според законот, имавме факти иако одлуката е донесена со надгласување, изјави новинарката Оливера Трајковска.
Трајковска рече дека и кога новинарите лично не биле на тапет, професионално известувале и за пропустите за Лустрациската комисија.
Инаку, новинарката Јадранка Костова е прогласена за соработник поради емисијата „Без наслов но со повод“, која се емитуваше на МТВ. Иако комисијата за лустрација се уште официјално не го објавува нејзиното досие, Костова јавно ја објави причината зошто е лустрирана на денот на годишнината од смртта на нејзиниот колега Никола Младенов.
-Зарем не е веќе кристално јасно колку Фокус е систематски третиран од фамилијата на власт! Не ги задоволи смртта на Никола Младенов и згаснувањето на дневен Фокус. Продолжија да нѐ гонат пред нивните судови и судии. И тоа не им ги насити ниските страсти, веројатно затоа што ја преживеавме казната … и еве ја смислија лустрацискава комедија, вели Костова.
Од законот за лустрација беа изземени поранешни функционери , претставници на здруженија, невладини организации и претставници на верски заедници.