Семејството на Дебора Ќерими Џамбази која почина при породување со царски рез во болницата Санте Плус, е незадоволно како се води целиот процес од страна на институциите, од бавноста на ОЈО, од извештаите од Судска медицина за смртта на родилката и за бебето кое остана со трајно оштетување на мозокот.

Кичевчанката, 31 годишната Дебора и самата медицинско лице, стоматолог по професија, почина на 18 јануари 2018 година при вовед на анестезија од задушување поради неправилно поставен тубус од страна на анестезиологот. Бебето, малиот Лисандер поради тоа остана со трајно ошетување на мозокот, дише преку трахеостома, се храни преку гастростома и е под 24 часовна нега.

Во емисијата ПРОЦЕС тие раскажуваат што се случувало во болницата  во тие три часа за време на трагичниот настан, за неорганизираноста, немањето на апарат за оживување, збунетиот медицински персонал за кои велат, во тие моменти ја прикривале смртта.

Тие бараат институциите да се коригираат и да дадат одговори на суштински прашања кои се многу важни во истрагата, а ги нема во Извештајот: Зошто бебето не било извадено од утробата на мајката веднаш, колку време страдало за кислород и дали тоа е причината за оштетувањето на мозокот,  времето кога настанала смртта на мајката и која е причината за тоа и други.

Расветлувањето на случајот, велат ќе спречи ова да не се повтори и други.  Семејството порачува дека  доколку во најскоро време институциите не се коригираат и не пристапат кон сериозно и брзо решавање на случајот, тие се подготвени да организираат масовни протести пред сите инволвирани институции.