Снимател: Трајче Антоновски

Монтажа: Дарко Груевски

Од Париз стаса пријатно изненадување за Македонија. Париското движење Ноќно бдеење ја поддржува нашата Шарена револуција!

Има ли навистина заеднички точки помеѓу ова социјално француско движење и македонските протести?

За потсетување, Ноќното бдеење е родено овој март во Париз. Како одговор на предлогот на француската влада за нов закон за работни односи. Критичарите велат дека законот е одличен за работодавачот а многу лош за работникот. Протестите во Париз не стивнуваат.

Низ цела Европа, во Германија, Шпанија, Белгија… се појавуваат слични социјални движења кои протестираат и се борат за повеќе социјална правда, повеќе демократија и подобар живот.

– Тоа и ние тука го бараме. Меѓутоа ние имаме елемент плус а тоа е дека имаме диктатор. Тоа е поразлично отколку Франција и Германија.  Но тие имаат проблем со десничарските влади. Тоа е сврзната точка, вели Јасмина Голубовска, активист.

Овие движења одлучија да си подадат рака, да разменуваат искуства. да покажат солидарност едни со други и да ја информираат јавноста. Така, Ноќното бдеење во Париз излезе со поддршка за Шарената револуција.

– Не прашаа како да ви помогнеме да станете на европско ниво повидливи и ние едноставно им рековме дека ние користиме боја, направете акции со боја, не сме им сугерирале какви ќе бидат акциите ниту како ќе ги изведат.  Таа е соработката. Тоа е многу едноставно, човечки и многу убаво од аспект на солидарност на ниво на Европа, вели Голубовска.

Во знак на солидарност поддржувачите на Ноќното бдеење решија да го бојат парискиот асфалт. Но не и историските објекти и споменици. Има една битна, клучна разлика помеѓу Париз и Скопје. Денешниот лик Париз го доби во 19 век и стана пример за урбана архитектонска хармонија. И најнезадоволниот Парижанец е горд на архитектурата на градот. А урбанистичките проекти за Париз 2050 година се еколошки и модерни.

Тоа не може да се каже за проектот Скопје 2014 кој за жал стана предмет на подбив низ светските медиуми.

Шарената револуција има намера наскоро со акции да ја покаже својата солидарност кон сестринските движења во Европа. Засега не даваат детали за акциите. Ги чуваат како изненадување.

– Така и ние ќе возвратиме, ќе видиме нешто од наша страна каква поддшрка ние да дадеме за социјалните движења во Европа. Не само во Франција туку и Occupy Germany, има и во Чешка анти фашистички движења, Шведска, Норвешка…. И тоа не е нешто ново. Можеби е ново за Груевски но за нас не е, вели Голубовска.

Конечно, сите овие европски движења потсетуваат на 68 година. Тешко е да се превиди нивната иднина. Но, едно е сигурно. Земаат се поголем замав и нивното влијание е во пораст.