Вака се однесува претседателот на Комисијата за европски прашања, Арбр Адеми, напиша пратеникот на ВМРО-ДПМНЕ, Мите Лефков на неговиот Фејсбук профил, како дополнување на постираниот видео материјалот од реакцијата на поранешниот министер за образование и наука.
Пратениците од власта и опозицијата со меѓусебни обвинувања за инцидентот на собраниската Комисија за европски прашања, а својот став, преку соопштение, го сподели и претседателот на парламентот, Талат Џафери.
Од Кабинетот на Џафери соопштија дека веднаш била свикана координација на која биле поканети сите претставници на политичките партии во Собранието. Но, како што се наведува во дописот, се појавиле само Јован Митревски, координатор на пратеничката група на СДСМ, Горан Мисовски, потпретседател на Собранието, и пратеничката од „Алтернатива“, Сафије Садики Шаини, а не и претставниците на ВМРО-ДПМНЕ и на Алијанса на Албанците.
Џафери, како што се посочува, ја свика координацијата по двочасовниот обид на членовите на опозициската ВМРО-ДПМНЕ, со процедурални забелешки да се обидат да се спротивстават да се изгласа дневниот ред на Комисијата, кој на крајот, сепак, беше изгласан.
„На координацијата беше донесен заклучок дека собранискиот Деловник ги дава сите можности за работа на Собранието и не дозволува насилство во која било форма. На координацијата исто така се заклучи и тоа дека граѓаните самите ќе проценат од снимките кои се вртат по социјалните мрежи кој го предизвика инцидентот на Комисијата за европски прашања. Ниту во земјите членки на Европската Унија не се дозволува насилство врз претседавачот со седница на работно тело на Собранието“, се посочува во соопштението.
Пратеникот Антонио Милошоски од ВМРО-ДПМНЕ обвини дека Комисијата за европски прашања, чиј претседател е Арбр Адеми од ДУИ, се претворила во „комисија за Див Запад“ и оти не се почитуваат ниту Деловникот, ниту пратениците, ниту јавноста.
„Денешниот тек на седницата ескалираше во моментот кога претседателот на комисијата им оневозможи на пратениците Илми Азири, Халил Снопче, Дафина Стојаноска, мене, пратеникот Бране Петрушевски од Куманово и други, да го искористиме нашето деловничко право да предложиме пред да биде усвоен, измени и дополнувања на Дневниот ред. Ние имавме конкретен материјал и измените и дополнувањата сакавме да ги предложиме во насока на анализа на заклучоците од Брисел коишто се однесуваа на Македонија и се уште се актуелни“, изјави Милошоски.
Според него, на седницата на Комисијата се направила голема тензија кога Адеми почнал „освен со вербални напади, да фрла и со тврди предмети кон пратениците, да крши дел од собранискиот инвентар и да употребува разни вулгарности“ кон пратениците.