Таткото на починатото девојче Ева Крстановска вели дека „државата не сакаше да помогне во лекувањето на Ева“. Во изјава за медиумите, Благоја Крстановски таткото на 11 годишното девојче кое почина од редок вид на леукемија, негира дека немало понуда од болница во Германија, како што изјави вчера директорот на Фондот за здравство Ден Дончев.
Од болницата „Гисен“ во Германија каде што Крстаноски сакаа да ја лекуваат Ева, во имејл-комуникација одредиле приближна сума за лекувањето. Не издале профактура оти целата сума немало да ја плати ФЗОМ, туку требало да се вклучи и семејството со парите собрани од донации. Фондот инсистирал да добие профактура за да ги испочитува законските прописи. Таткото на Ева смета дека државата во ниту еден случај не постапила правилно при лекувањето на Ева: од третманот со хемотерапиите овде, до носењето на одлуката за одење во странство.
Крстаноски објаснува и дека одбиле да ја пратат Ева на лекување во Турција, како што одлучила лекарската комисија во Фондот, затоа што претходно три деца кои заминале таму починале.Тој вели и дека се обидел да разговара со министерот за здравство Венко Филипче, но „стигнал“ само до неговата секретарка.
Снимка од ТВ 24
Од ФЗО одговораат дека одлуката каде ќе се лекува Ева во странство ја донело лекарска комисија врз основа на добиените медицински податоци и конзилијарното мислење, како и врз основа на добиените понуди од странските болници.
„Потенцираме дека Фондот побара понуди од 22 странски болници, меѓу кои беа и болниците од Гисен и Дизелдорф. Понуди по барањето се добиени од Медикал Парк Истанбул, Турција, Газиосман Паша Истанбул, Турција и Бамбино Гесу Рим, Италија. Имајќи ја предвид итноста на случајот и согласно добиените понуди, комисијата одлучила соодветно во рок од 48 часа. Комисијата ја одбра болницата Газиосман каде лекувањето на девојчето ќе чинело 145 000 евра.
Од Фондот велат дека понуди од болниците во Гисен и Дизелдорф не биле добиени ниту презентирани во Фондот од страна на барателот, а дека писмото од болницата во Гисен до семејството на Ева било само информативно електронско писмо, кое нема конкретни елементи на понуда и затоа комисијата при одлучувањето за избор на лекувањето не можела да земе в предвид понуда која не е презентирана.
„Фондот ја разбира желбата на родителот, како и на сите родители за лекување на нивните деца каде што тие сметаат дека е најдобро, но Фондот работи во рамките на законските прописи и процедури кои ги вклучуваат двете лекарски комисии (првостепена и второстепена) составени од 14 еминентни медицински стручњаци, чија задача е да ја изберат најсоодветната понуда за секој барател кој бара лекување во странство, базирано на здравствената состојба, како и на критериуми на солидарност и правичност за сите осигурени лица подеднакво“ пишува во соопштението од Фондот.
11 годишното девојче Ева почина пред два дена – таа една година боледуваше од леукемија.