Дел од студентите кои ноќта ја поминаа на Филолошкиот факултет веќе се будни.
Нивните колеги со гласна музика и свирежи утринава рано ги разбудија оние кои успеаа барем за момент да заспијат.
Студентите велат дека досега нема никакви притисоци, ниту инциденти, и посочуваат дека немаат намера да ја напуштат автономната зона. Во одлично расположение од рано утринава, дел од Пленумци се забавуваат во аулата на Филолошкиот факултет.
Денеска во 12:30 часот студентите ќе прогласат автономна зона и на техничките факултети.
За во текот на денот најавени се низа активности, како и герила акции.
Првиот ден од окупацијата на Универзитетот помина во пријатна атмосфера. Околу 100 студенти останаа на Филолошкиот факултет за да ја одбранат автономната зона.
Во текот на вчерашниот ден студентите времето го поминаа со музика, цртање и читање книги. Во аулата на факултетот студентите ги топлеа пијалоците на решоа, кои со себе ги понеле од дома, а храната се служеше од импровизираниот студентски штанд. Голем број на граѓани се одзваа на солидарниот повик и донираа храна, ќебиња и вреќи за спиење за студентите.
Студентите во рамките на првата вечер спроведоа и герила-акција кон ТВ водителот Јанко Илоски, за кој, како што велат Пленумци со месеци наназад ги игнорира нивните активности. Тие вчера се јавија во живо во емисијата „Јади Бурек“.
Еден студент, претставен како Ѓорѓи, загрижен бидејќи не може да нормално да оди на настава на факултетот, се јави преку социјалната мрежа Скајп и преку порака го замоли водителот да го вклучи дирекно во емисија.
Водителот го прифати видео повикот и студентите се вклучија во живо во емисијата.
По краткиот разговор, во кој студентот на водителот му рече дека се јавува од дома и наивно зборуваше колку е револтиран од окупацијата која ја спроведуваат 20-30 студенти, му посочува на водителот дека има специјален поздрав за него и ја сврте камерата кон Пленумците кои го извикаа водителот дигајќи среден прст и извикувајќи автономија.
Освен студентите, во текот на вечерта во автономната зона се појавија и неколку професори од професорскиот пленум.
Окупацијата на Универзитетот претставува одговор на студентите на понудата на премиерот Никола Груевски измените во Законот за високо образование да ги стави во двегодишно мирување. Студентите ја отфрлуваат ваквата понуда и бараат изготвување на целосно нов закон.
Студентскиот пленум бара да се потпише спогодба помеѓу Интеруниверзитетската конференција и Министерството за образование и наука која ќе опфаќа: загарантирано учество на Студентскиот пленум во изработката на целиот закон со цел тој да ги рефлектира студентските ставови и перспективи. Формирање на работни групи во кои членовите од Студентскиот и Професорскиот пленум ќе бидат рамномерно застапени, рокови за изработка на прв и втор Нацрт на законот.
-Универзитетот треба да претставува бастион на критичката мисла која води кон напредок. Тоа е онаму кај што не препишуваш, кај што не заокружуваш од понуденото, онаму кај што не ти се сервираат одговори, онаму каде што не те учат што да размислуваш – туку како! Заради тоа сметаме дека е нужно да се прогласи автономна зона. Универзитетот на кој што се извршија континуирани упади мора да се ослободи, истакнаа Пленумци.