Недоволниот број на респиратори за дишење, инкубатори, немањето простор за интензивна нега, болничките инфекции од кои умираат бебиња, лошите услови, нарушените меѓучовечки односи меѓу лекарите се дел од причините за зголемената смртност на новороденчиња, тврдат на Клиниката за гинекологија. Специјална комисија и санитарни инспектори чешлаат досие по досие, за да утврдат точно која е причината за големата смртност на новороденчиња. Само во првите девет месеци од оваа година на клиниката починале 127 новороденчиња, минатата година тој број изнесуваше 184 и е двојно поголем од претходната кога починаа 99 новороденчиња.
„Да се прочешла се и да ни препорачаат што треба да правиме. Предвидено е од 3500 до 4000 раѓања, а ние имаме по 6000 годишно. Има интерхоспитални инфекции, тоа се предвреме родени деца немаат имунитет, сетоа тоа влијае. Имаме само 10 респиратори, нема место за инкубатори. Ние немаме кадар, луѓето се изморени , немаме инструментарки, немаме анестезиолози ги увезуваме од КАРИЛ, немаме педијатри “, изјава Викторија Јовановска директорка на Клиниката за гинекологија.
Оваа млада жена има ризична бременост и скоро два месеца е прикована за кревет кој е стар со децении, со дупка во средината. За секое нејзино движење таа мора да вика медицинска сестра или болничар бидејќи може да се случи при движење да го изгуби бебето.
„Тука сум пет и пол месеци не смеам да станувам и на секое движење барам медицинска сестра или болничар не смеам сама да се свртам. Креветот е стар, неудобен, тешко е. Мислам дека треба нови кревети“, рече пациентка.
Клиниката за гинекологија е стара само пет години, но родилките и трудниците и тие со ризична бременост престојуваат на стари и искинати душеци, наместо кревети со механизми специјално приспособени за тоа. Оваа соба не е единствената во која бебињата и мајките лежат во искинати кревети. За сметка на тоа претходната директорка си го уредила кабинетот со скап мебел во вредност од 20 000 евра и купила непотребни компјутери.
„Еве, ова се комјутерите и ајпадот, дали и требало на една директорка ова“, рече Јовановска.
Посебно критично е на одделот за интензивна нега каде поради малиот број на респиратори, лекарите се принудени да избираат кое бебе ќе го исклучат пред време од апарат. Недостасуваат и инкубатори, како и простор каде ќе бидат сместени. Нарушените односи меѓу лекарите, притисоците и стравот од претходната власт да се кажат проблемите, го направиле своето.
„ Плаќањето по учинок ги наруши меѓучовечките односи. Но, не е само тоа тука со години никој не смееше никој ништо да каже луѓето беа заплашувани под притисок, казнувани, беше како во војна многу страшно“, изјави Јовановска.
Клиниката за гинекологија денеска ги отвори вратите за јавноста. Од она што го регистрира екипата на НОВА може да се види дека лабораторијата и стерилизацијата се сместени во подрумски простории, каде за време на поплавите излегувале фекалии. Наместо прозорци има решетки од шахти, апаратите стојат на бироа стари по 40 години или на позајмени училишни клупи, а вентилацијата е голем проблем во целата клиника.