ВМРО – ДПМНЕ ги повика сите институции на централно и локално ниво да го игнорираат и бојкотираат операционализирањето на Законот за употреба на јкзиците . Генералниот секретар на ВМРО ДПМНЕ Игор Јанушев понуди и правна помош ако некој од одговорните во институциите се соочат со закани или притисоци.
„ Со овој закон се урива уште еден темел на Република Македонија кој ги поврзуваше сите етнички заедници кои живеат тука. Овој закон е уште една хипотека преку која Заев се обидува да ја плати цената за неговото доаѓање на власт и затоа ваквото однесување на СДСМ и ДУИ е срамно и неприфатливо“ рече Јанушев.
ВМРО ДПМНЕ оценува дека Законот е спротивен на Уставот и затоа ќе го поднесат иницијатива до Уставниот суд за испитување на уставноста на Законот, а против Талат Џафери и директорот на Службен весник ќе поднесат кривични пријави.
„Потпишувањето и праќањето на законот за двојазичност во Службен весник од страна на господинот Талат Џафери, без потпис на претседателот на државата, Ѓорѓе Иванов е незаконски и насилнички обид да се протуркаат решенија кои ќе остават далекусежни последици по државата“ рече Јанушев.
„Незаконското објавување на законите е злоупотреба на службена должност и е казниво согласно член 353 од Кривичниот закон на Република Македонија. Ова дело не застарува за година или две за да може сторителот да биде амнестиран од Кацарска судството на Зоран Заев. Со оглед на тежината на делото и огромните штети за Република Македонија кои би ги предизвикало незаконското објавување во Службен весник, ставот 5 од членот 353 предвидува затворска казна од најмалку 5 години“ рече Јанушев.
Јанушев ја повика власта да го распушти Собранието и да закаже предвремени парламентрани избори заедно со претседателските.