Зоран Заев е оптимист за разговорите кои се водеа во вторникот во Стразбург поради сериозното ангажирање на високи функционери на ЕУ.
Пораките се позитивни, вели тој и разговорите може да се каже дека се успешни и даваат шанса за почеток на вистински преговори за сите точки.
Запрашан да даде детали од разговорот во Стразбург, Заев рече дека не сака тоа да го направи бидејќи не сака да влијае на процесот. Било договорено дека ЕУ е таа која треба да соопшти детали.
Заев тврди дека меѓународната заедница ќе се вклучи и во лидерските преговори кои се одвиваат во Скопје под медијаторство на амбасадорите на САД и на ЕУ и очекува дека меѓународната заедница ќе испрати свој претставник кој ќе биде гарант за се што ќе биде договорено на овие лидерски средби.
Околу изјавата на рускиот министер за надворешни работи Лавров, Заев рече дека тој не е во право бидејќи Македонија не тежнее кон федерализација, македонскиот народ има единство и нема политички мотив тоа да се наруши: “Ние политичарите треба тоа да го искористиме за добро на земјата”, вели Заев.
Што се однесува до “бомбите”, лидерот на СДСМ вели дека само една третина од нив се објавени и дека биле спремни 102 снимки. Но поради инцидентите во Куманово, СДСМ не успеал да го објави она што го имаат за случајот Смилковци и за А1 телевизија. Најави дека ќе се откријат и многу други случаи кои се од интерес за граѓаните.