Бројот на поднесени барања за азил во Германија од страна на македонски граѓани повторно почна да расте во април годинава. Растот е значителен и тој изнесува дури 60 отсто месец за месец.
Ако бројот на барања за азил во март годинава изнесувал 148, следниот месец, април, оваа бројка порасна на 247, извести германската Сојузна служба за миграциии и избеглици, а пренесе „Танјуг.“
За големината на оваа бројка говори и фактот што во април од Србија во Германија азил побарале 482 лица, значи нешто помалку од двојно од Македонија, иако Србија има барем четири пати поголема популација. Инаку, и Србија бележи раст на бројот на азиланти во април, споредено со март, кога бројот на барањата изнесувал 385 лица, но овој раст изнесува 20 отсто и не е ни приближно голем како македонскиот.
Србија е на четврто место со 1.750 поднесени барања за азил во Германија од почетокот на годинава зад Русија (5.026), Сирија (3.046)и Авганистан со 2.195 барања.
Прашањето на големиот број лажни азиланти од Македонија и Србија, од кои, според германските податоци, над 90 отсто се Роми, лани доведе до тоа тамошните политичари да бараат дури и да се испита можноста за укинување на безвизниот режим со овие две земји.
Во Германија минатиот месец беше поднесено вкупно 7.541 барање за азил, што е за 1.962 лица или 35,2 отсто повеќе од март, покажува германската статистика, според која особено е висок растот на бројот на подносители на барања за азил од Руската Федерација.