Претседателот Ѓорѓе Иванов не одговори на предлогот да ја прифати Алатката за отчетност, со што одбива да ги информира граѓаните за неговите службени трошоци.
– Се уште нема одговор од претседателот Ѓорге Иванов, на писмото од Владата со предлог и Канцеларијата на претседателот да ја прифати Алатката за транспарентно, отчетно и одговорно владеење. Владата го повика претседателот на РМ да ги стави на увид на јавноста информациите и податоците за трошењето на парите на граѓаните, се вели во соопштението од владината прес служба.
Во писмото, испратено на 29 мај, министерот задолжен за комуникации, отчетност и транспарентност Роберт Поповски, го информирал претседателот Иванов дека Алатката за транспарентно, отчетно и одговорно владеење им е достапна на сите избрани функционери кои се подготвени да ги стават во секој момент на увид на граѓаните информациите и податоците за трошењето на нивните пари.
Во писмото Владата го информира претседателот Иванов, дека преку Алатката за отчетност, пред граѓаните на досега се објавени трошоците на премиерот, на министрите и на замениците на министрите, на државните секретари и на генералниот секретар на Владата, а таа обврска ја имаат и директорите и замениците директори на самостојните органи на државната управа, на органите во состав на министерствата и на Инспекцискиот совет, како и директорите на јавните претпријатија, на агенциите и на акционерските друштва во сопственост на државата.
Алатката за одговорно владеење им е предложена и на градоначалниците на општините, кои, во меѓувреме, со одлука на Управниот одбор на ЗЕЛС добија препорака да ги објавуваат трошоците на носителите на јавни функции на своите веб страници.
-Иако сите овие информации, вклучително и информациите за користење на оваа алатка за лесно пребарување низ трошењата на избраните функционери, беа наведени во писмото до Канцеларијата на претседателот на Република Македонија, заедно со понудата за асистенција за користење на Алатката, ниту од Канцеларијата, ниту од претседателот Иванов, досега нема одговор дали ја прифаќа или не можноста на отворен и транспарентен начин да им покаже на граѓаните како Канцеларијата на претседателот на Република Македонија ги троши нивните пари, нацедуваат од владината прес-служба.