Владини претставници, веднаш по објавата на веста дека се замрзнати дел од сметките на Субрата Рој во Индија стапиле во контакт со фирмата на индискиот бизнисмен, во обид да се утврди дали случувањата во матичната земја можат да го загрозат проектот во Македонија, објавува порталот Фактор.
Сега се чека одговорот на Рој, после кој ќе биде појасно дали е доведен под знак прашање проектот Сахараја Македонија.
Одговорот најверојатно ќе биде во форма на соопштение со кое Сахараја Груп ќе ги извести сите свои деловни партнери за состојбата, а Македонија е една од потенцијалните локации за инвестиции на индискиот милијардер.
Како што вчера објави НОВА, Судот во Индија на барање на индискиот регулатор СЕБИ ги замрзна сите сметки на тамошниот милијардер Субрата Рој.
Замрзнати се сите сметки и целиот имот на фирмите од Сахара Груп, како и личните банкарски сметки и личниот имот на Субрата Рој и уште тројца од неговите директори.
Откако индискиот врховен суд пресуди во спорот помеѓу регулаторното тело и Сахара Груп и ја задолжи компанијата да врати 3 милијарди евра со 15 проценти камата на милиони измамени граѓани.
Министерот за финансии, Зоран Ставревски, неодамна изјави дека не е загрижен поради спорот на Субрата Рој во Индија бидејќи тоа било работа на друга држава, а за него било важно да се реализира она што е договорено тука.
„Ќе објаснат ли Груевски и фамилијата пред граѓаните на Република Македонија, кој е всушност Субрата Рој и што се крие зад неговата т.н. инвестиција. Ќе објаснат ли дали е извршена трансакција за хотелот Славија кој наводно го купи Индиецот“, стои во соопштението на огранокот во Охрид на ВМРО-НП.