Од 2014 година и во наредните пет години, Владата ќе дава државни пари за продуцирање популарна македонска музика – забавна, народна и музика за деца, преку конкурси што ќе ги спроведува Македонската радио-телевизија.
По десет композиции годишно ќе бидат финансирани од категориите „Таленти“, „Поттикнување семејни вредности и многудетни семејства“ и „Афирмирање на Република Македонија и нејзината историја“.
Според министерката за култура Канческа Милевска, причина за донесувањето на законот е евидентниот пад на продукцијата на ваков вид музика во последната деценија. Целта на законот е да ги стимулира финансиски изведувачите, а крајниот резултат да биде поголем обем и квалитет.
Според овој нацрт закон, МРТ ќе објавува четири конкурси годишно (април, јуни, септември, декември) за субвенционирање 200 композиции во текот на годината – 50 песни за деца и 150 песни од забавната и од народната музика.
За секоја категорија има критериуми: број на албуми и солистички концерти во Македонија и во странство, број на домашни и меѓународни награди, учество на фестивали, меѓу кои се вреднува и во финалето на Евросонг.
Највисок износ е за категоријата „Ѕвезда“- 4.500 евра, од кои 3.000 за звучно снимање на песната и 1.500 за спот. Поддршката за детска песна е 400 евра, а за останатите категории е до 3.000 евра.
За генералниот директор на МРТ, Марјан Цветкоски, донесувањето на овој закон е историски момент.
Иво Јанкоски, издавач од продукцијата „Трето уво“, вели дека законот се донесува во најтежок и најнепродуктивен период за македонска музика кога доминира, како што рече, „музичка депонија и грд шунд од Балканот“. Но, нагласува дека тој ќе нема ефект ако медиумите не се придржуваат на регулативата за најмалку 30 отсто домашна музика во етерот.
„Не ми е јасен моментот од класификацијата песни за поттикнување на многудетни семејства. Какви се тие песни? Такви досега не постојат во историјата на светската музичка продукција. Чинам дека малку се измешале лончнињата пак.
Иако, искрено, идејата за поттикнување е добра. Конечно, можеби ќе се размрда македонската музичка продукација. Но, да не се заборават светските стандарди, кои одлично функционираат, а за жал кај нас никогаш не се практицирале.
Фестивалите и конкурисите сепак не се начин за продукција на музика во 21 век. Тие посебно кај нас, како што покажува искуството, носат најслаб квалитет. Нас ни треба квалитет, а не квантитетот. Токму бројките и презаситетноста со слаб музички квалитет се најглавните винонвици за презаситеноста и незаинтересираноста на публиката за македонската музика„ – вели за НОВА Вики Чадиковска, музички новинар.