На синоќешната 19-та седница Владата го усвоила предлогот за измени на Законот за минималната плата од 12.000 денари, а одобрени се нови 10 милиони евра директна помош за земјоделците.
Во соопштението од Владата се вели дека со овие измени кои сега треба да одат во собраниска процедура, ќе се обезбеди и финансиска поддршка од буџетот за фирмите да ја исплаќаат договорената повисока минимална плата.
На седницата на Владата се донеле измени на предлог програмата за финансиска поддршка во земјоделството како и програмата за рурален развој со кои се издвојуваат нови 10 милиони евра директна поддршка за земјоделците.
Министерството за земјоделство, шумарство и водостопанство треба да изработи предлог програма за изменување и дополнување на програмата за финансиска поддршка на земјоделството во 2017 година и предлог уредба за изменување и дополнување на уредбата за директни плаќања во земјоделството за 2017.
Во однос на кадровските прашања, Владата на вчерашната седница ги разгледала и ги усвои кадровските предлози и заклучи да именува членови на управни и надзорни одбори во установи, агенции и други органи што се во надлежност на владата.