Педесет и шест годишниот Илија Петрески од алкохол апситинира веќе единаесет години. За НОВА ТВ ја раскажа својата потресна приказна за триесетгодишното дружење со алкохолот кога го допрел дното.
Илија, сега несебично им помага на сите оние од кои државата кренала раце. Но, тој имал срека што во неговиот град има клуб на лекувани алкохоличари. Многу граѓани што имаат потреба од помош немаат ваква можност бидејќи во државата постојат само седум вакви клубови.
Експертите предупредуваат дека проблемот треба да се сфати сериозно бидејќи се повеќе деца и млади луѓе стануваат зависнини од алкохол. Фрапантен е податокот што во последната година се создаде и нова категорија зависници од алкохол кои бараат стручна помош. Тоа се луѓе интелектуалци, бизнисмени, политичари кои не успеваат да го издржат стресот и притисокот и посегнуваат по алкохолот.
Државата нема стратегија за борба против алкохолот. Освен што се казнија некои дуќани кои продаваа алкохол по 19 часот, речиси ништо друго не се направи. Наместо тоа, се организираат фестивали на алкохолот каде се пие со тони, ракија, пиво или вино. Но, затоа пак, за реклами кои се емитуваа само еден месец, беа потрошени дури 600 000 евра.
Во Македонија има од 60 до 80 000 регистрирани алкохоличари, но, се претпоставува дека овој број е три до четири пати поголем.