На вонредна седница, Владата го разгледа Предлогот за пристапување кон измена на Уставот на Република Македонија и до Собранието достави „ Насоки за изменување и дополнување на Уставот на Република Македонија“.
„Сега сите пратеници, без разлика на која партија ѝ припаѓаат имаат историска должност и обврска пред граѓаните, да го обезбедат патот на Македонија кон стабилност, безбедност и економски просперитет, а тоа е патот кон НАТО и ЕУ кој води преку македонско-грчкиот договор.
Од денеска остварувањето на оваа визија е во рацете на секој пратеник одделно и таа зависи од нив“ рече владиниот портпарол Миле Бошњаковски.
Во предлогот за измени на Уставот, предложени се четири амандмани:
1. ДОДАВАЊЕ НА ПРИДАВКАТА СЕВЕРНА ВО ИМЕТО НА РЕПУБЛИКА МАКЕДОНИЈА
Во целиот текст на Уставот на Република Македонија пред зборот Македонија се додава придавката Северна.
2. ИЗМЕНИ ВО ПРЕАМБУЛАТА НА УСТАВОТ
Заради усогласување на текстот на Преамбулата со Договорот со Грција, во Преамбулата ќе бидат извршени соодветни измени. Во Преамбулата на Уставот на Република Македонија при наведувањето на државно-правните традиции, ќе се именуваат конкретни документи на АСНОМ, односно ќе се внесе повикување на Прогласот од Првото заседание на АСНОМ до македонскиот народ за одржаното заседание на АСНОМ, со неговите конститутивни одлуки.
3. ИЗМЕНИ ВО ЧЛЕНОТ 3
Во членот 3 од Уставот е регулирано дека територијата на Република Македонија е неделива и неотуѓива. Постојната граница на Република Македонија е неповредлива. Република Македонија нема територијални претензии кон соседните држави. Границата на Република Македонија може да се менува само во согласност со Уставот, а врз принципот на доброволност и во согласност со општо прифатените меѓународни норми.
Овој член веќе беше изменет во 1992 година со Амандманот I, кога беше додаден принципот на доброволност при промена на границата и согласноста со општо прифатените меѓународни норми. Исто така со овој амандман беше декларирано дека Република Македонија нема територијални претензии кон соседните држави.
Со новиот уставен амандман кој се предлага ќе се декларира почитување на суверенитетот, територијалниот интегритет и политичката независност на соседните држави.
4. ИЗМЕНИ ВО ЧЛЕНОТ 49
Во членот 49 од Уставот е пропишано дека Републиката се грижи за положбата и правата на припадниците на македонскиот народ во соседните земји и за иселениците од Македонија, го помага нивниот културен развој и ги унапредува врските со нив. Републиката се грижи за културните, економските и социјалните права на граѓаните на Републиката во странство. Републиката притоа нема да се меша во суверените права на други држави и во нивните внатрешни работи.
И овој член беше изменет со Амандманот II во 1992 година ко предвидуваше дека Републиката нема да се меша во суверените права на други држави и во нивните внатрешни работи.
Со уставниот амандман кој се предлага ќе се декларира грижа за културните, економските и социјалните права на припадниците на македонскиот народ и сите наши граѓани во странство, без тоа да значи мешање во суверените права на други држави и во нивните внатрешни работи, во било каква форма и заради било каква причина.
Од Владата напоменуваат дека доколку Договорот не биде ратификуван во Парламентот на Република Грција, ќе престане важноста на овие амандмани.
Согласно Договорот со Грција сите официјални документи и материјали на јавната администрација ќе се обновуваат со истекот на нивното важење, но најдоцна во рок од пет години по влегувањето во сила на договорот. Издавањето на новите документите коишто се исклучиво за внатрешна употреба во Република Македонија ќе се издаваат при отворањето на секое поглавје на релевантната област во преговорите со Европската Унија и ќе биде финализирано во рок од пет години оттогаш.
На прашањето дали е обезбедено двотретинско мнозинство во Собранието, Бошњаковски кажа дека „Владата денеска го започнува процесот за стратешката цел на Македонија, а тоа е членството во НАТО и ЕУ и очекуваме пратениците да го следат гласот на народот и тоа за што се изјаснија граѓаните на 30 септември“.
Од Владата велат дека многу скоро ќе се знае дали има двотретинска подршка – по расправата во уставната комисија, предлогот ќе биде ставен на пленарна седница во Собранието и за да отпочне процесот за измени на Уставот ќе биде потребно 80 пратеници да гласаат „за“.