Заврши снимањето на краткометражниот филм „Влакна“. Ќе се прикажува во рамките на Интернационалниот фестивал на филмска камера „Браќа Манаки.
Со сцените направени во битолската чаршија, на повеќе локации во Скопје, Скопска Црна Гора, и во Битола, заврши снимањето на краткометражниот филм, работен според сценарио и во режија на Елеонора Венинова, а во продукција на Partes Social Advertising.
За централен дел на сценариото се неколку активности кои за цел ја имаат промоцијата на активизмот во креативните индустрии. Продуцентот Небојша Илијевски вели дека она што следи на овој план, е работилница за ангажиран филм која ќе се одржи исто така во рамки на претстојното издание на „Браќа Манаки“.
– За време на снимањето, седум млади луѓе, кои се нашата идна филмска сила добија сериозен коучинг од своите поискусни колеги. Концептот на продукцијата на овој филм е тоа што покрај одличен филмски производ, да понудиме и можност на надежните идни филмски дејци да го надоградат својот талент со директното искуство во продукција на филмот, за кое сметаме дека е незаменлив дел од сопствената надоградба на секој режисер, сценограф, костимограф и било кој филмски работник – вели тој.
Трифун Ситниковски, млад филмаџија, асистент на режија и скриптер, објаснува дека би сакал и самиот да направи слично дело кое освен што ќе ја истакне креативноста, ќе им даде и можност на младите ентузијасти да учествуваат во професионален филмски процес.
– Освен тоа што се запознав и соработував со фантастични и многу талентирани луѓе, секој ден имаше нешто што можев да го научам од нив. Од секој сектор, од секоја област на снимањето на филмот, добив практично знаење што знам дека ќе ми користи во иднина и многу ќе ми помогне во донесувањето на важни режисерски решенија – вели Ситниковски.
Режисерката и сценаристка Елеонора Венинова рече дека снимањето се одвивало според планот и секој ден екипата го завршувала зацртаното.
„Една од причините е што се создаде одлична атмосфера во тимот и членовите на екипата се зближија и функционираа како вистински тим. Младите луѓе кои беа дел од тимот одлично се вклопија во работата, постојано се интересираа за работниот процес и за тоа како подобро да ги завршат нивните задачи, а поискусните членови секогаш беа на располагање за помош. Секако, имавме ситуации кога се правеа грешки и пропусти, но тие се исправаа со ентузијазмот на сите членови на екипата и волјата да се излезе надвор од рамката на сопствените одговорности, така што до крајот на снимањето „работата на филмот“ стана „работа на нашиот филм“, објаснува Венинова додавајќи дека планираат да го промовираат „Влакна“ и на фестивали во странство.
Главните улоги ги толкуваат македонската актерка Ирена Ристиќ и српскиот актер Бојан Жировиќ.