Пратениците од власта и опозицијата кои се членови на собраниската комисија за одбрана и безбедност ќе предложат да биде усвоена декларација за поддршка на пристапниот процес за членство на Македонија во НАТО.
На координативниот состанок на членовите на собраниската Комисија за одбрана и безбедност, кој се одржа денеска сите претставници на парламентарните групи дадоа согласност.
„Очекуваме дека оваа декларација ќе биде со акламација усвоена на седницата на Собранието следниот вторник, на 17 јули, изјави денеска претседателот на собраниската Комисија за одбрана Хари Локвенец.
„Секогаш вакви декларации и резолуции со кои се поддржува влезот на Република Македонија во Европската Унија и НАТО се носеле со консензус од сите политички партии како надпартиски документ.ВМРО-ДПМНЕ секогаш ги поддржувало, ги поддржува и ќе ги поддржува во иднина рече координаторот на пратеничката група на ВМРО ДПМНЕ Драган Данев.
За декларацијата ќе се гласа на седницата закажана за 17 јули. На оваа седница требаше да се гласа и за новиот состав на Државната изборна комисија, но изборот на комисијата и натаму е блокиран.
Локвенец вели дека Законот за финансирање на партиите со кој ВМРО ДПМНЕ го условува изборот на ДИК е усогалсен, но за СДСМ е неприфатливо барањето на опозицијата за „пржинска влада“ која би се формирала пред секој парламентарни избори се до влезот на Македонија во ЕУ. Во актуелниот Закон за Влада, пишува дека само премиерот ќе отстапи од својата позиција 100 дена пред одржување на изборите, а опозицијата бара да има смени и во други министерства со кои би раководеле членови од сегашната опозиција.
„Зборуваме за Законот за Влада и се спомнува некаква „пржинска влада“. Сите бевме сведоци за потребата од носењето на една таква одлука за воведување на предизборна пржинска влада. Пржинската влада ја исполни својата улога и својата функција. После пржинската влада имавме два циклуси на избори – парламентарни и локални кои од сите релеватни фактори беа оценети на највисоко демократско ниво, рече Локвенец.
Од ВМРО ДПМНЕ велат дека со „пржинската влада“ ќе се врати довербата во изборниот процес и не отстапуваат од своите барања. Роковите за избор на ДИК се веќе пробиени. Секое одолговлекување на изборот го доведува во прашање и одржувањето на рефрендумот. Министерката за правда Рената Десковска денеска предупреди дека „секое доцнење со формирање на Комисијата, може да значи и недоволна подготвеност новоизбраните членови да ги спроведат сите активности што се неопходни за рефрендумот“.