ВМРО ДПМНЕ бара опозицицијата да го предложи новиот шеф на Обвинителството за гонење на висока корупција и криминал и изборот да не биде само од редот на обвинителите, туку да се прошири и за шеф на ова обвинителство да можат да се предложат и професори со долг стаж.
Исто така, ВМРО ДПМНЕ бара со разрешувањето на Јанева или со прекинот на нејзиниот мандат на 15 септември, да заврши и мандатот на другите обвинители во СЈО и тие да се вратат во обвинителствата каде што претходно работеле. За предметите кои обвинителите од СЈО ги имаат отворено, а немаат судска разрешница, ВМРО ДПМНЕ бара да се префрлат кај јавниот обвинител и тој потоа да ги распредели на други обвинители во Обвинителството за организиран криминал кои од почеток да ги разгледуваат сите докази и искази што ќе значи дополнително одолговлекување на предметите и нивно застарување.
„Еден од амандманите на ВМРО-ДПМНЕ се изборот на обвинителот на новото обвинителство да биде на предлог на опозицијата, како и принципот на хиерархирја и субординација – предметите на СЈО во судска постапка да одат кај државниот обвинител и потоа тој да ги распредели во обвинителството за организиран криминал, како и изборот на обвинителот да не биде само од редот на обвинители, туку да може да конкурираат и професори“, рече Антонио Милошоски од ВМРО ДПМНЕ.
За власта овие предлози на опозицијата се неприфатливи. Пратеничката од СДСМ Снежана Калевска Ванчева рече дека мешањето на политиката во изборот на првите луѓе на обвинителствата, би го нарушило принципот на независност и оти треба да се направи се политиката да не се меша во кадровските ршенија, независно дали станува збор за Јавно обвинителство за организиран криминал или од редовното обвинителство.