Прес конференцијата на Зоран Заев е тотална лага и измислица, соопштува ВМРО-ДПМНЕ, реагирајќи на прашањето на Заев дали Груевски земал 1, 5 милион евра во кеш.
-Ваквото однесување на Заев е класичен кукавичлук и е катастрофален обид да го покрие изборниот срам што му се случи во неделата.
Ваквите измислици и ваквиот начин на дејствување не се нови за СДСМ. Секогаш користеле навреди, лаги, омаловажувања и манипулации.
Народот му кажа што мисли за неговот концепт во неделата, но тој во неговата самобендисаност и ароганција, не разбирајќи ја пораката од народот дека нема доверба во него, живее во некој свој свет во кој што сите се криви, народот е крив, само тој никако не е крив.Тоа доаѓа од човекот кој се откорна од делење тендери на своите браќа, братучеди, чичковци, снаи и доаѓа од човекот кој доби аболиција за сторен криминал од 8 милиони евра од неговиот ментор Бранко Црвенковски.
Заев за покажувањето на ваква нестабилност и ароганција, паника, страв и конфузност, кои доминираат во неговиот израз додека ги шири лагите, ќе добие нова казна од граѓаните на 27-ми април. Таа порака ќе биде поубедлива од онаа што ја доби на 13-ти април, затоа што продолжува да ги потценува.
Овој човек се нуди себе си да биде премиер на државата, а не покажува ниту грам почит кон граѓаните, а најмалку покажува достоинство.
Ние апелираме граѓаните да го казнат ова негово несериозно и потценувачко однесување.
Ние ќе продолжиме да ја почитуваме волјата на граѓаните и ќе продолжиме да работиме на презентација и реализација на над 2046 проекти кои, убедени сме, ќе донесат добро на граѓаните.
Зоран Заев сам ќе потоне во сопствената негативна кампања базирана на лаги, соопштува ВМРО-ДПМНЕ.
Претходно, Заев постави неколку прашања до Груевски:
1. Дали како претседател на ВМРО-ДПМНЕ си земал пари во кеш во износ од 1.500.000 евра или повеќе од 92.000.000 денари ?
2. Дали ти како македонски патриот, овие пари, 1.500.000 евра или 92.000.000 денари, си ги земал од познат бизнисмен?
3. Дали, Никола Груевски, тебе ти е државата пред сѐ? Ако ти е пред сѐ, зошто си ја оштетил државата 225.000 евра, четврт милион евра, или повеќе од 14.000.000 денари за неплатен данок ?
4. Дали си ти прататкото на оф-шор мрежите, оф-шор компаниите преку кои се изнесува капиталот на македонските граѓани, а се внесува како капитал на фамилијата?
5. Дали со овие пари купуваш гласови?
„Никола Груевски, бидејќи си мераклија на граѓаните и на државната администрација да им држиш предавања по етика, еве ти можност да им ја одржиш најважната лекција. Лекцијата по искреност. Биди искрен со македонската јавност, излези на прес-конференција и кажи си што ти ја мачи совеста, ако воопшто ја имаш.
Кажи го тоа поради кое твои блиски соработници не спијат веќе долго време. Никола Груевски, ќе кажеш ти за 1.500.000 евра или да кажеме ние?“, праша на крај Заев.