Најдобар начин да се спроведе целата оваа процедура е да се направи електронски попис, кој што ВМРО-ДПМНЕ цело време го бара. Со електронски попис, без физичко посетување на граѓаните во домовите, ќе се спречи заразата да се шири
Одговарајќи на новинарски прашања при посетата и средбите со граѓаните во Драчево-Општина Кисела Вода заедно со кандидатот за градоначалник, Орце Ѓорѓиевски, потпретседателот на Вмро Дпмне, Александар Николоски истакна дека неговата партија цело време барала да се спроведе електронски попис со што би се избегнало физичко посетување на граѓаните во домовите, така што би се спречило ширење на заразата и би се заштитело здравјето на граѓаните.
„Најдобар начин да се спроведе целата оваа процедура е да се направи електронски попис, кој што ВМРО-ДПМНЕ цело време го бара. Со електронски попис, без физичко посетување на граѓаните во домовите, ќе се спречи заразата да се шири, а ќе може точно да утврдиме колку има население во Македонија за да нема манипулации какви што власта сега сака да прави. Така што, решение е електронски попис за да се заштити здравјето на граѓаните и да нема манипулации“, изјави Николоски.
Тој зборуваше и за тоа што нема доволно пријавени попишувачи за претстојниот попис.Причината ја лоцира во отсуството на интерес кај оние кои не се партиски определени, зашто знаеле, според Николоски дека изборот одел преку СДСМ.
Николовски ја критикуваше и кампањата за вакцинирање, зашто според него, тоа било уште еден начин власта да направи пари со злоупотреба на буџетски средства.
При посетата на Општина Кисела Вода, Николоски рече оти е убеден дека Орце Ѓорѓиевски ќе го освои гласот на граѓаните од ова населба зашто станувало збор за чесен, посветен и човек кој си ја сака општината.