Судскиот совет ги поништи огласите за избор на тројца судии во Врховниот суд, откако членовите во Советот, предложени од ВМРО ДПМНЕ и од ДУИ не успеаја да ги усогласат ставовите и да изберат некој од пријавените кандидати.
Камен на „сопнување“ беше до неодамнешниот заменик претседател на Судскиот совет, Башким Бесими, кој поднесе оставка од таа позиција, за да стане судија на Врховниот суд. Но, коалициониот договор се изјаловил во последен момент, па членовите Македонци не го поддржаа нивниот довчерашен шеф да влезе во Врховниот суд.
Тој не доби поддршка ниту на поединечното изјаснување што се спроведе по барање на членовите Албанци.
Откако видоа дека нивниот предлог не поминува, Албанците по принципот на „Бадентер“ гласаа против фаворитот на владејачкото мнозинство, па така државната правобранителка Оливера Китанова не беше избрана за судијка во Врховниот суд.
Поради различните ставови во Советот, тие не се договорија ниту за третиот кандидат. На седницата не присуствуваше министерот за правда Блерим Беџети, иако тој неделава два пати бараше да се одложи изборот за да се испеглаат разликите.
Во скопскиот апелациски суд унапредена е судијката од кривичниот суд Лидија Чачева, вториот судија од предметот „Ровер“ каде што му се суди на Љубе Бошковски. Во овој случај, за в понеделник се закажани завршните зборови, но по изборот на Чачева, јасно е дека нема да има завршни зборови, туку судењето мора да почне од почеток поради промена на судија во советот кој суди.
Во Апелација Скопје избрана е и Катерина Георгиевска, судијка од скопска двојка, сопруга на обвинителот во организиран криминал Влатко Георгиевски и Станка Зафировска, од граѓанскиот суд како и гостиварскиот адвокат Агим Беслими.
За 11 јуни се закажани избори за еден член во Судскиот совет, на местото на Неџат Ајро, кој заминува во пензија, па ДУИ за тоа место, за кое гласаат самите судии, го токми претседателот на скопска двојка Бекир Шаини. Судски избори тврдат дека позицијата на Шаини е сигурна, а веќе нашле и замена, па се очекува граѓанскиот суд да го води млада судијка Албанка, која до пред две години работела во Владата на Република Македонија.
Пишува: Саше Димовски