Премиерот Никола Груевски го доби и веќе одговори на писмото на еврокомесарот за проширување Штефан Филе, потврди владиниот портпарол Александар Ѓорѓиев.
– Во одговорот премиерот Груевски изрази благодарност за континуираната поддршка која еврокомесарот Филе ја дава на Република Македонија и на реформскиот процес на кој сите ние заеднички работиме, и за заедничкиот напор кој што во изминатите неколку години ја повлече напред нашата земја создавајќи прогрес кој ја отвори можноста понудена од Европскиот Совет на декемвриски самит во 2012 година.
– Премиерот Груевски изрази и жалење за потешкотиите за надминување на политичките предизвици произлезени од настаните на 24 декември и деструктивното однесување на опозицијата, истакнувајќи дека е свесен за тоа каков ризик се отвора за споменатата можност во контекст на европската агенда.
– Истакнувајќи дека еврокомесарот Филе е добро запознаен со сите наши обиди и заложби за придвижување на работите и надминување на состојбите дури и кога наспроти нашата отвореност, подготвеност за дијалог и компромис наидуваме на несериозен и нерационален пристап од другата страна, премиерот Груевски во писмото напиша и дека во изминатиот период понудивме многу опции и излезни решенија за кои и самиот Филе е свесен дека од наша страна е даден максимум за надминување на оваа ситуација, се вели во пишаната изјава на Ѓорѓиев.
Премиерот, поосочува владиниот портпарол, „наведе и дека иако многумина сметаат дека сите идеи и можности се веќе исцрпени и сега се повторуваат како стари позиции во понуди како да се нови, сепак ние остануваме одговорни, отворени и посветени за продолжување на делувањето согласно јавно искажаните принципи и за евентуални конкретни предлози од било кого, вклучувајќи конкретни предлози и од страна на Филе“.
– Во контекст за соработката и дијалогот со медиумите, премиерот Груевски во писмото истакна дека и покрај нашиот досегашен прогрес, нема да престанат нашите напори за унапредување на состојбите на ова поле, се вели во изјавата на Ѓорѓиев.
Груевски во писмото до Филе, подвлекува и дека во следниот период преку надлежните служби до еврокомесарот ќе биде испратен преглед на досегашниот напредок во контекст на Високиот пристапен дијалог и развојот на добрососедските односи.
По писмото на Груевски, експресен одговор и на СДСМ.
Потпретседателот на партијата Зоран Јовановски коментира дека „сите активности на СДСМ, вклучително и предлогот од минатиот петок, се фер, конструктивни, демократски, позитивно насочени, но власта тоа и понатаму не го разбира и покажува инает за кој странците мораат да ни укажуваат“.
Според СДСМ „во секое демократско општество одговорноста за состојбите во земјата оди кај власта и сега е моментот Груевски да го направи тоа што треба да го направи“.
Јовановски потсети дека за политичката криза во земјата „имаше повеќе соопштенија во повеќе наврати, не само од комесарот Филе, туку и заеднички соопштенија на ЕУ, НАТО, Стејт Департментот, ОБСЕ“:
Јовановски потврди дека писмото на Филе доаѓа кога генералниот секретар на СДСМ се наоѓа во Брисел:
„Тој таму има средби со повеќе претставници на Унијата и неговата посета таму е со цел тој повторно да ги објасни и реафирмира ставовите на СДСМ околу тековната политичка ситуација во Македонија и уште еднаш да ја објасни позицијата на СДСМ околу неучеството на локалните избори. Ние нашиот предлог го дадовме, ќе повторам, на потег е премиерот Груевски“, вели Јовановски.