Изборната кампања стартува в понеделник. Партиските каравани се подготвени, слоганите се смислени, кандидатите за пратеници ги учат говорите. Дел од партиите за НОВАТВ ги открија главните пораки кои ќе им ги испратат на граѓаните, но најголемите ривали на претстојните парламентарни избори СДСМ и ВМРО-ДПМНЕ ги кријат се до стартот на кампањата.
Го прашавме комуникологот Петар Арсовски, колку се важни слоганите и дали тие влијаат на изборниот резултат.
„Слоганот влијае, зашто е сублимат на политичката порака за кампањата. Тој по правило треба да биде краток, концизен, и на едноставен начин да ја пренесе емоцијата со која партиите настапуваат на изборите“, вели Арсовски за НОВАТВ.
Менаџерот за стратешки комуникации во агенцијата Имиџ ПР, Магдалена Михајлоска, вели дека со секоја кампања, а политичките не се исклучок, главна цел е да се пренесе една главна порака која е носечка за целокупната комуникација на кампањата.
„Оттука слоганот на кампањите во време на избори ја содржи во една кратка форма нејзината суштина, стилот и тонот на сите активности што ќе бидат преземени и начинот на кој ќе се реализираат тие доколку се освои власта. Да не звучам толку теоретски слоганот е основа на сите активности и главна порака која треба да се пренесе на гласачкото тело. Сите понатамошни активности се фокусирани кон дообјаснување на носечкиот слоган или негово ставање во функција на моменталниот дневно политички контекст, за да можат гласачите што подобро да ја разберат пораката од различни аспекти“, објаснува Михајлоска.
„Не се плашете, режимот ќе падне“
Арсовски направи и куса анализа за тоа каква порака преку слоганот ќе ни испратат партиите и коалициите.
На овие избори, владејачката партија ДУИ на Али Ахмети ќе настапи со слоганот „Заедно одлучуваме“.
„Мислам дека овде ДУИ се обидува да покаже заедништво со народот и да имплицира дека ќе бидат одлучувачки фактор“.
Коалицијата за промени и правда на Демократски сојуз, ФРОДЕМ, МОРО и ДЕМОС ќе оди со порака две во едно – „Не се плашете, режимот ќе падне“, која истовремено ги охрабрува граѓаните да гласаат и директно ја напаѓа владејачката партија.
„Самиот слоган кажува се и е обид за поголема излезност на протестниот глас“.
ДПА на Мендух Тачи на гласачите им ветува „Одиме право“.
„Овој е општ слоган за продолжување, континуитет“
Движењето Беса и НДП ќе настапат заедно на овие избори под слоганот „Денес или никогаш“.
„Ова е слоган кој повикува на промени, на излезност за гласање за нив“
За прв пат оваа година, на изборите ќе се појави новата партија „Левица“ со слоганот „Искра во мракот“.
„Светло на крајот на тунелот, другите понуди се мрак“
Од СДСМ велат дека се уште го немаат дефинирано слоганот и дека размислуваат за две опции. Иако, неофицијално се зборува дека во слоганот ќе доминира зборот живот. Од ВМРО-ДПМНЕ рекоа дека изборната порака ќе ја обелоденат во понеделник кога официјално стартува изборната кампања. Слоганот не сака да го открие ни коалицијата ВМРО за Македонија на Достоинство, ВМРО-НП и Обединети за Македонија. Тоа ќе го стореле на првиот митинг на коалицијата кој е предвиден за вторник.
Михајлоска од Имиџ ПР објаснува дека како и во секоја кампања кога треба нешто да се продаде на граѓаните, внимателно се избираат зборовите, па дури и интерпункциските знаци, бидејќи тоа го покажува стилот на политичката опција и како истата планира да ги спроведе политичките чекори во насока на реализирање на политичката програма.
„Слоганот го одредува духот на политичката партија во моментот и нејзините погледи и планови за начините за справување со предизвиците во општеството, независно од левичарската или десничарската ориентација“, ни изјави Михајлоска.
На претходните избори во 2014 година владејачката партија на чело со Груевски го избра слоганот „Има разлика. Ти можеш да препознаеш“. СДСМ се реши за „Промени за нов почеток“. ДУИ одеше со „Заедно подобри, заедно посилни, заедно во Европа“, ДПА со „ДПА за слобода“, НДП порача „Време е“, а коалицијата предводена од ГРОМ на Стевчо Јакимовски настапи со „Храбри луѓе, горда држава“.
Анализата е дел од соработката помеѓу НОВА ТВ и ПортАлб.