ВМРО-ДПМНЕ и СДСМ попладнево испратија неколку соопштенија по денешната “бомба” на опозициската партија.
Според ВМРО-ДПМНЕ – “СДСМ денеска се закопаа” со лаги, додека СДСМ инсистира на тоа дека “Никола Груевски продолжи да ја лаже јавноста и да манипулира, што покажува за каква неморална личност станува збор”.
Во својата реакција СДСМ тврди дека “Законот за амнестија за хашките случаи е донесен по договорот на Груевски со Ахмети во 2011 година, по нарачка” и дека “лично Груевски наредил Владата да даде автентичното толкување со што ќе отвори пат за донесување на Законот за амнестија за хашките случаи”.
СДСМ напоменува дека Законот за амнестија за хашките случаи е изгласан во Собранието на 19 јули 2011 година.
На ова ВМРО-ДПМНЕ одговара дека “Законот за амнестија не е донесен во 2011 туку е донесен во 2002 година”.
“За тој закон гласале целиот врв на СДСМ. Гласал и Бранко Црвенковски, гласала и Радмила Шеќеринска која денеска лицемерно се смешкаше, знаејќи дека го пуштила низ вода Зоран Заев. За истиот закон гласале и Јани Макрадули, Никола Поповски и Ѓорѓи Спасов”, вели владеачката партија.
На соопштението е додаден список на пратениците од гласањето во 2002 година. На него може да се види дека гласале “за” Бранко Црвенковски, Радмила Шеќеринска, Јани Макрадули, Никола Поповски, Ѓорѓи Спасов.
Очигледно е дека двете партии зборуваат за два различни законски текста. Законот за амнестија е донесен во 2002 година. Но во 2011 година, на пленарна седница на Собранието, е гласано (на денешната “бомба” се зборува токму за ова гласање) автентичното толкување на Законот за амнестија како што СДСМ вели во споменатата реакција:
“Лично Груевски наредил Владата да даде автентичното толкување со што ќе отвори пат за донесување на Законот за амнестија за хашките случаи”.
На ова гласање во 2011 година пратениците на СДСМ гласале “против”. Оваа партија исто така испрати список од гласањето во Собранието на кое се гледа дека пратениците на ВМРО-ДПМНЕ и на ДУИ гласале „за“ а пратениците на СДСМ гласале „против“.
Овој список се однесува на гласањето во 2011 година. Додека списокот што го испрати ВМРО-ДПМНЕ до медиумите се однесува на гласањето од 2002 година.
Но, според ВМРО-ДПМНЕ, станува збор за внатрепартиска пресметка кај опозицијата:
“Денес целата јавност виде внатрепартиска пресметка во СДСМ. Или некој сака да го пушти Заев низ вода или тој сака да им се освети на другите членови на раководствата на СДСМ кои гласале за овој закон”, се вели во втората реакција на ВМРО-ДПМНЕ на денешната “бомба” на опозицијата.