Портпаролот на ВМРО ДПМНЕ Димче Арсовски на прес конференција рече дека истрагата за случајот Рекет е фарса.
За партијата е спорно тоа што обвинителката Јанева на распит дошла со адвокатот Стеван Павлески, кој истовремено е и бранител на бизнисменот Цветан Панделески во предметот „Империја“ на СЈО.
„Доколку Катица Јанева сакаше да и помогне на истрагата, како што вели, да дојде до главата на октоподот – ќе отидеше сама, ќе соработуваше и ќе кажеше се што знае за оние кои ги нарачале сите овие рекети. За тоа не и треба адвокат. Адвокатот и треба само за да се прикријат дупките и за да се има контрола врз се она што ќе каже, бидејќи очигледно Катица Јанева нема сама капацитет да отиде и да даде исказ во обвинителство“, рече Арсовски.
Арсосвки тврди дека Катица Јанева во СЈО не дозволувала присуство на адвокати кога се сослушуваат сведоци, со едноставно образложение дека не станува збор за лица кои се предмет на истрагата.
Специјалната јавна обвинителка Катица Јанева денеска четири и пол часа сведочеше за случајот „Рекет“. По распитот порача дека не чувствува вина, но и дека сите дилеми ќе се разјаснат кога предметот ќе дојде до суд.