Пратеничката група на ВМРО ДПМНЕ и нивните коалициски парнтери, за предлогот за утврдување одгoворност на претседателот Иванов, ќе гласаат против, соопшти координаторот на пратеничката група на ВМРО ДПМНЕ Илија Димовски.
Димовски вели дека Иванов не го прекршил Уставот, „без разлика дали некому тоа му се допаѓало или не“. Тој повика иницијаторите за формирање на ваквата комисија да ја повлечат одлуката, бидејќи таа според него нема уставна подлога, а од друга страна е сосема јасно дека нема да помине во Собранието затоа што ВМРО ДПМНЕ и коалициските партнери ги имаат мнозинството гласови.
– Мислам дека одлуката на Иванов за помилување не беше потребна во овој момент, но судење на Претседател за одлука која има право да ја донесе е неприфатливо. Иванов има политички легитимитет и неговото дејствување е од сериозно значење за државните институции, изјави Димовски.
Според него, дебатите во Собранието треба да се осврнат на широките реформски приоритети и смета дека постаоката за импичмент е во ислулчително погрешно време.
Во 13 часот пратениците ја почнаа расправата за предлог-одлуката за основање на Комисија која ќе треба да ја оцени основаноста на предлогот за покренување постапка за утврдување одговорност на претседателот Ѓорге Иванов.
Барањето за утврдување одговорност на претседателот Ѓорге Иванов, која ја поднесе пратеничката група на СДСМ до вчера ја потпишале вкупно 52 пратеника, што е доволно за да може да се почне процедурата за отповикување на претседателот. Иницијативата за отповикување на Иванов ја потпишале пратениците од СДСМ и коалиционите партнери,16 пратеници од ДУИ, независните пратеници, Лилјана Поповска од ДОМ и Павле Трајанов од Демократски сојуз, тврди СДСМ.
Овие потписи се доволни за иницијативата да влезе во собраниска процедура, но засега нема двотретинско мнозинство, односно 82 гласа, кое се потребни за оваа иницијатива да има позитивен епилог. Барањето на СДСМ беше поднесено на 13 април.