Не постои можност за било каков политички договор за предвремени парламентарни избори, ниту постои можност за прифаќање на било какви уцени од страна на СДСМ, реагираат од владејачката ВМРО-ДПМНЕ.
Во однос на прашањата за излез од сегашната криза, креирана директно од СДСМ, ВМРО-ДПМНЕ го реафирмира својот став:
1.Не постои можност за било каков политички договор за предвремени парламентарни избори, ниту постои можност за прифаќање на било какви уцени од страна на СДСМ.
2.Не постои можност за одложување на датумот 24 март 2013 година, кога е предвидено одржување на редовните локални избори.
Сите други идеи за надминување на кризата создадена од СДСМ, а планирана од нивна страна уште од месец јуни, во кои не се содржани овие две точки, ВМРО-ДПМНЕ внимателно ќе ги анализира и ќе се произнесе, стои во реакцијата на ВМРО-ДПМНЕ.
Реакцијата на ВМРО – ДПМНЕ следеше по објавата на некои медиуми дека потпретседателот на СДСМ, Зоран Заев изјавил дека СДСМ доставиле предлог со пет точки кои во голем дел се согласуваат со предлозите на претседателот Ѓорге Иванов и премиерот Никола Груевски за да се надминат несогласувањата.
Според објавата на дел од медиумите, барањата на СДСМ биле локалните избори да се одложат за две недели, до почетокот на април за да се реализираат предлозите на претседателот и премиерот, а опозицијата да се подготви за изборите.