Според ВМРО-ДПМНЕ, не е точно дека нема услови за фер и демократски избори, туку СДСМ не биле подготвени да излезат на избори. Оваа реакција на партијата на власт е еден ден откако САД и ЕУ ја соопштија дека нивните проценки се дека засега нема услови за избори на 24.април.
– Точно е и дека заради тој страв СДСМ сака пролонгирање на кризата и СДСМ е подготвена на се за да го направи тоа, се вели во соопштението до јавноста на владејачката партија.
Според ВМРО-ДПМНЕ, претставниците на САД и ЕУ не презентирале ниту еден сериозен и кредибилен аргумент во прилог на тезата за неподготвеноста на Република Македонија за избори со што било јасно дека станува збор за проценка базирана на политичка одлука, а не факти.
А при објавувањето на проценката вчера, американскиот амбасадор, Џес Бејли нотираше дека се уште не се донесени реформите за медиумите и сериозно треба да се работи на препораките од Прибе, односно Итните реформски приоритети.
Во оценката на ЕУ и САД се вели:
„Нотираме дека резултатите од работата на ДИК во однос на проверката на избирачкиот список во оваа фаза не се доволни за да се одржат кредибилни избори на 24 април,иако одреден напредок е направен. Исто така се уште не е постигнат договор за медиумските реформи за да се осигура поле за еднаков пристап.
Исто така сме загрижени од извештаите за притисоци и закани врз гласачите и други лица. Сето ова е многу загрижувачко“, стои во извештајот.
ВМРО-ДПМНЕ од друга страна вели немало валидни аргументи за одложување на изборите.
– Во претходните денови, во интензивната комуникација со нив, на сите нивоа, како политичко, така и техничко, се уверивме дека нема валидни аргументи за одложување на изборите. Затоа вчера ја повикавме Државната изборна комисија, партиите и засегнатите меѓународни претставници на јавна дебата. Затоа Претседателот на ДИК вчера се криеше и избегнуваше средба во текот на целиот ден. Ваквите состојби може да ја воведат земјата во нови проблеми и наместо кон излез од кризата да ја однесат кон нејзино продлабочување, образложува ВМРО-ДПМНЕ.