На вчерашниот втор круг од локалните избори ВМРО ДПМНЕ ја освои локалната власт во 56 општини. Наспроти нив опозиционерите добија доверба во 4 општини.
Победа на овие локални избори прогласи владеачката партија и во етнички албанскиот етнички кампус, ДУИ освои 5 градоначалнички функции додека опозициската ДПА има победа само во Струга.
За владеачките партии овие избори се потврда за нивната работа додека опозиционерите обвинија за голем број на нерегуларности во избирачкиот процес.
Премиерот Никола Груевски вториот изборен круг го оцени како успешен и како победа на сите граѓани и на Република Македонија. Наспроти лидерот на ВМРО ДПМНЕ, лидерот на опозицискиот СДСМ изјави дека изборите не се демократски.
„И ова што го видовме на овие локални избори е само кулминација на тоталитаризмот на режимот на Никола Груевски. Се применија сите досега познати, а богами и непознати тактики и стратегии за фалсификување на волјата на граѓаните. За нас овие локални избори не беа фер, не беа демократски и за нас не беа легитимни.“ изјави Бранко Црвенковски.
Од ВМРО ДПМНЕ на овие обвинувања одговорија дека се обид на опозиционерите да најдат алиби со кое пред јавноста ќе го оправдаат поразот.
Невладините организации кои го мониторираа изборниот процес тврдат дека изборите поминаа со многу нерегуларности. Регистрирани се притисоци врз гласачи , носење на гласачи од Пустец, семејно гласање, искористување на неписмени лица, јавуваат од невладините Цивил, Мост и Хелсиншкиот комитет.
Во текот на денешниот ден својот прелиминарен извештај за текот на изборите пред јавноста ќе го презентира и набљудувачката мисија на ОБСЕ и ОДХР.