ВМРО-ДПМНЕ реагира дека медиуми блиски до СДСМ известувале селективно и ја занемариле презентацијата на Отчетот на партијата која вчера ја водеше екс-премиерот Никола Груевски.
– Граѓаните кои ги следеа овие медиуми не дознаа дека на промовирањето на Отчетот на ВМРО-ДПМНЕ, беше соопштено дека работата на владата на ВМРО-ДПМНЕ донесе рекордни 150.000 новоотворени работни места, од 560 000 вработени на над 710 000 вработени во Македонија. Граѓаните кои ги следат медиумите кои го фаворизираат СДСМ немаа можност да дознаат дека платите на просветните работници се во постојан раст при што најниската плата од 2006 година до денес е зголемена за 119%, а највисоката за 67%, додека за пензионерите просечната пензија е зголемена за над 70%, а најниската за повеќе од 90%, се вели меѓу другото во соопштението на партијата.
Како што вели партијата на власт, СДСМ не сакале слободни медиуми и сакале тотална контрола врз медиумите.
– Врв на лицемерие е кога СДСМ зборува за слободни, фер и избалансирани медиуми. Во реалноста, СДСМ се однесува тоталитарно како да е на власт во Северна Кореја или ИСИС, смета партијата ВМРО-ДПМНЕ.
Во соопштението до медиумите, тие ги набројуваат телевизиите Телма и 24 Вести, а помеѓу порталите и НОВА.
Редакцијата на НОВА потсетува дека за време на презентацијата, објави информативни содржини за Отчетот на партијата согласно новинарските стандарди: „Груевски: Остварени се и нешта што не сме ветиле, тоа нè прави различни“, „Заврши Отчетот на ВМРО-ДПМНЕ: „Во нашите проекти може да се најде секој“ и повторно отворено упатува повик до претставници на ВМРО-ДПМНЕ да гостуваат во Студиото или во Нова Дебата каде што гостите одговараат на прашања на корисниците на социјалните мрежи, и впрочем да ги образложи нападите кон нашиот медиум.