Владејачката партија ВМРО-ДПМНЕ ја обвини опозицијата дека се обидува да ја наруши финансиската стабилност и финансиските текови.
-Обидот е класичен акт на финансиски тероризам од страна на аболицираниот криминалец Зоран Заев и неговата дружина врз граѓаните на Република Македонија. СДСМ стори уште едно финансиско злосторство обидувајќи се со лаги и невистини да го блокира издавањето на еврообврзницата, која е вообичаен начин на финансирање на секоја европска држава.
СДСМ се обиде да упадне во финансискиот систем со намера да спречи инвестиции во градинки, училишта, патишта, болници, отворање на нови работни места и други проекти. Република Македонија е посилна и ќе ја надмине и оваа нова деструктивна епизода на Зоран Заев. Тој и неговите послушници ќе ја добијат сметката од граѓаните на наредните избори за ваквото финансиско насилство врз државата, се вели во соопштението на ВМРО-ДПМНЕ.
Издавањето на еврообврзница е одложено денеска откако до заедничкиот менаџмент составен од претставници на Сити, Дојче банк, Ерсте банк и Сосиете женерал кои требаше да тргуваат со неа било испратено писмо од Наумов во кое се наведува дека земјата можеби нема легална основа за нејзино издавање.
Наумов на денешната прес-конференција порача дека pроцесот на издавање на еврообврзницата од 650 милиони евра е одложен, но не и прекинат, бидејќи власта побарала правно толкување за важноста на целата постапка од страна на Министерството за правда кое ќе биде испратено до банките за тоа дали е неопходно толкаво задолжување, мислење кое согласно Законот за јавен долг требало да биде издадено пред носењето на одлуката за задолжување.
– Никола Груевски и ВМРО ДПМНЕ по којзнае кој пат спасот го гледаат во својот коалиционен партнер ДУИ. Со ваквото темпо на задолжување Груевски и ВМРО ДПМНЕ ги туркаат граѓаните и РМ кон финансиски колапс. Пари во Буџетот за плати и пензии има. Задолжувањето е за непродуктивни трошења корупција и криминал. Со ребаланс на Буџетот власта може веднаш да скрати огромни средства за непродуктивни трошоци како 18 милиони евра за Милениумско тркало, 5 милиони евра за барокни фасади, а може да се продаде и мерцедесот на Груевски од 600.000 евра, рече Наумов.
Според него доколку цената на еврообврзницата се зголеми при следното задолжување, тоа нема да биде поради неговото писмо испратено до заедничкиот менаџмент на банките кои треба да тргуваат со еврообврзницата, туку ќе биде поради сомнежите за злоупотреба на средства од ИПА програмата, дефицитот на Буџетот, а е јасен сигнал што Македонија остана и без постојан претставник на ММФ.