Владејачката партија ВМРО-ДПМНЕ реагира на изјавата на портпаролот на СДСМ Петре Шилегов кој денеска рече оти петте судии од Уставниот суд кои гласала за да се прифати иницијативата претседателот да може да помилува осудени за изборни измами се послушници на ВМРО ДПМНЕ.
„ВМРО-ДПМНЕ е партијата која и покрај противењето на СДСМ во 2009 година ги предложи измените во Законот за помилување.
Со тие измени се предвиде да не може да има помилување за одредени категории осуденици како оние на кои им одредена казна за дела поврзани со избори, педофилија и слично.
ВМРО ДПМНЕ останува со ист став и денес. Секој што сторил каков било криминал, треба да одговара. Таков беше ставот и кога обвинетиот криминалец Зоран Заев беше аболициран од страна на Бранко Црвенковски.
СДСМ денес во препознатлив стил се обиде да ја манипулира јавноста и да лаже дека ВМРО ДПМНЕ стоело зад одлуката на Уставен суд.
Затоа ВМРО ДПМНЕ отворено се сомнева дека токму СДСМ има најголем интерес за една ваква одлука.
Впрочем, медиумите неодамна објавија дека СЈО без основа го побарало и предметот за педофилија кој се води против членови на семејството на Зоран Верушевски, осомничен во предметот „Пуч“ и близок соработник на Зоран Заев.“ се вели во соопштението на ВМРО-ДПМНЕ.
Уставниот суд денеска ја прифати иницијативата поднесена од адвокат Ристо Китевски за измени во Законот за помилување со којшто на претседателот на државата во иднина ќе може да му се овозможи да помилува лица осудени за изборни измами и нерегулароности, но и тероризам, педофилија и други тешки дела коишто во 2009 станаа тргнати од истиот закон. За прифаќање на иницијативата гласаа 5 судии, а се противеа четворица.