Произволното толкување на Изборниот законик од страна на Агенцијата за аудио и аудиовизуелни медиумски услуги (поранешен Совет за радиодифузија)
Во членот 76-а од Изборниот законик стои дека бесплатното претставување на политичките партии на јавниот сервис МРТВ се дели во однос 1/3 на дневни настани од земјата и светот, 1/3 за претставување на кампањата на партии од власта и 1/3 за кампањи на партиите од опозицијата, при што внатре во третините времето ќе се распредели според резултатите од последните парламентарни избори, реагираат од ВМРО-Народна партија.
Според нив откако на седницата на Агенцијата за аудио и аудиовизуелни медиумски услуги или поранешен СРД на 28.01.2014 година донесена е методологија за мониторинг на изборното медиумско претставување во која истото што го пишува во Изборниот законик е запишано и во методологијата што ја усвојува Агенцијата, веќе на следната седница Агенцијата донесува методологија за измена и дополнување на методологијата каде што го менува начинот на одредување на третините што ќе ги користат партиите и вели дека не според резултатите од последните парламентарни избори како што е утврдено во Изборниот законик туку времето ќе се распредели согласно бројот на пратеничките места што го има освоено секоја партија на претходните парламентарни избори.
Од каде го црпи правото Агенцијата да се става над Законот и над Собранието како највисок законодавен орган во Р.Македонија што го донел овој Изборен законик и од каде право на Агенцијата произволно да го толкува Изборниот законик?, прашува партијата.
ВМРО-Народна партија на претходните парламентарни избори освои близу 30.000 гласови и во македонскиот блок беше на 3-то место веднаш зад коалициите на ВМРО ДПМНЕ и СДСМ.
Според Изборниот законик, според тие резултати треба да ни припадне соодветна минутажа за бесплатно претставување на јавниот сервис, но според методологијата за измена на методологијата од Агенцијата нам не ни припаѓа ништо, сметаат од ВМРО-НП.
Тие најавија жестока реакција до Агенцијата и до Македонската радиотелевизија и до ДИК-ќе ги запознаеме и сите релевантни меѓународни субјекти кои ги набљудуваат изборите дека еден државен орган се става над највисокиот законодавен дом во државата.
Конечно, партиите кои што освоиле пратенички места на последните избори имаат околу 1.000.000 гласови, а оние партии кои не освоиле пратенички мандати освоиле околу 700-800.000 гласови, што значи дека поради кршењето на Изборниот законик и благодарение на сервилниот однос што го има Агенцијата за аудио и аудиовизуелни медиумски услуги и МРТВ кон власта огромен број на граѓани на ваков начин се наоѓаат во нерамноправна положба, лишени од правото да бидат информирани и во класична информациона изолација.