Граѓаните без двоумење и страв, му искажаа недоверба на министерот за труд и социјална политика, Спиро Ристовски, со своето непријавување во Агенцијата за вработување, се вели во соопштението од ВМРО – НП.
„Повеќе од очигледно е дека невработените граѓани не веруваат дека тој како министер за труд и социјална политика и оваа влада се способни за нив во моментов да најдат постоечки работни места, а уште помалку да создадат нови. Воедно невработените граѓани, кои се најбројна категорија во моментов, јасно покажуваат дека немаат доверба во државните институции водени од владата на Груевски“, вели партијата.
Во соопштението се потенцира дека најнапред се почнало со масовно бришење од списоците на невработени, па се продолжило со лишување на граѓаните од нивните основни права да бараат вработувања и одговорност за својата судбина „од вас и владата поради недемократските, неуставните и нехуманите измени на законот за вработување и осигурување во случај на невработеност“.
„Ние од ВМРО-Народна партија бараме министерот за труд и социјална политика, Спиро Ристовски, да им се извини на граѓаните на Република Македонија односно на сите невработени лица поради вчерашната изјава дека тие не бараат работа, можеби мисли дека имаат магија па можат да живеат без работа и без пари. ВМРО – НП бара од Министерот да понесе политичка и морална одговорност и воедно да признае дека тој и оваа Влада не се способни да понудат работни места бидејќи поради состојба во која ја доведоа државата истите ги нема. И конечно да се извини што се обидува граѓаните на Р.Македонија да ги направи слепи, глуви и неми упорно кажувајќи им дека се намалува невработеноста, иако истите се сведоци на секојдневно намалување на бројот на работници подолго од една година“, соопштува партијата.