ВРМО-НП смета дека со влегувањето на капиталот на бизнисменот Субрата Рој во Македонија, директно се нарушуваат неколку меѓународни принципи и стандарди од областа на организираниот криминал.
„Никаде во светот нема политички средби на премиер, претседател на држава и министер за финансии со бизнисмен за кој во неговата матична држава се водат неколку видови на истраги за финансиски малверзации и чии сметки и имот се замрзнати од Врховниот суд во матичната држава, и истиот суд согласно меѓународно ратификуваните договори бара неговите сметки да бидат замрзнати во странски земји“, реагираат од партијата.
ВМРО-НП јавно прашува колку е државниот врв на Македонија свесен за последиците од пресудата на Врховниот суд на Индија, бидејќи велат „истата таа пресуда е правно обврзувачка и за Р.Македонија. Дали тоа не значи дека највисоките државни функционери на овој начин се вклучуваат во меѓународен случај за перење пари“.
Од партијата на Љубчо Георгиевски прашуваат дали владата на Македонија со полна свест прифаќа да работи со оф-шор компаниите на Субрата Рој, со тотално непознати титулари на сопственоста и уште понепознато потекло на парите.
– Како што и е познато на македонската јавност ВМРО-НП повеќе години се залага за проектот амнестија на капиталот во Р.Македонија, максимална финансиска либерализација и законодавство кое соодвествува со законодавствата на оф-шор државите. Но, ова наше залагање значи системски и законски промени кои ќе важат еднакво за сите, а не само за неколкумина привилегирани избраници на власта, се вели во партиското соопштение.
Според нив, преку ваков специјален и привилегиран однос кон Субрата Рој, се кршат принципите за кои владата, велат, само декларативно се борела.