Во Апелациониот суд стигна нова жалба од адвокатите на екс специјалната обвинителка Катица Јанева по одлуката на Кривичниот суд да и се одбие гаранцијата која ја понуди Јанева за укинување на притворот или за замена со куќен.
Јанева преку својата aдвокатка Ирена Фрчкоска достави предлог до Кривичниот суд за укинување на притворот, за што како гаранција ги понуди двата стана на синот и ќерката и уште еден стан на член на потесното семејство, но Кривичниот суд го одби барањето.
„По разгледување и ценење на предлогот и мислењето од надлежното обвинителство, судија на претходна постапка донесе решение со кое предлогот за укинување на мерката притвор со определена гаранција се отфрла како недозволен, а предлогот за определување мерки за претпазливост се одбива како неоснован“ соопштија од Кривичниот.
Жалбата денеска е препратена до Апелација.
Претходно Апелација ја одби жалбата на Јанева за одлуката на Кривичен да и се продолжи притворот.
Повисокиот суд ја отфли жалбата, но укина уште една точка по чиј основ и беше одреден притворот на Јанева- судот процени дека нема можност да влијае на сведоците затоа што истрагата е завршена, но жалбата и беше одбиена поради опасност од бегство.
Јанева е во притвор од 21 август и е во Шутка повеќе од 45 дена за случајот „Рекет“ во кој е осомничена за злоупотреба на службената положба и овластувањата како шефица на СЈО.