Со пораки за јакнење на добрососедството и проширување и продлабочување на меѓудржавните односи и релациите меѓу двата народа, со благодарност за чествувањето на националниот празник на Република Србија односно на српската заедница во земјава, финишира вчерашниот Ден на Свети Сава за време на Светосавската свечена академија која по 15 пат се одржа во земјава.
На Светосавската академија присуствуваа српскиот министер за надворешни работи, Никола Селаковиќ, претседателката на Република Српска, Жељка Цвијановиќ, амбасадорите на Србија и на БиХ во земјава Невена Јовановиќ и Драган Јаќимовиќ , почесниот конзул на Србија во Северна Македонија Владимир Стајиќ.
Дел од присутните гости беа и претставници на државниот врв, лидери на политички партии, а свое обраќање имаше и претседателот на Владата, Димитар Ковачевски.
– Овој ден е посветен на една од најсветлите и најсветите личности во историјата на српскиот народ – Свети Сава. Свети Сава е втемелувач на самостојната српска православна црква и нејзин прв архиепископ. Тој е просветител, основач на училишта и болници, дипломат, пишувач на првите закони во државата српска. Свети Сава е посредник и помирител меѓу раскараните браќа и народи. Неговите лик и дело инспирираат и осум века по неговата смрт. Затоа кога велиме дека неговото дело инспирира, пред нас ја имаме и нашата определба. Определбата на граѓаните на Република Северна Македонија, да градиме и негуваме општество еднакво за сите. Граѓанско, едно општество за сите, во кое ги афирмираме и воспоставуваме меѓусебната почит меѓу сите етнички заедници во нашата земја. Признавањето на етничките, националните, верските и културните разлики е посебноста и суштината на нашето заедништво. Во тоа наше заедништво што го градиме низ вековите и што го негуваме денеска, свој значаен придонес има и српската заедница во Северна Македонија, истакна меѓу другото Ковачевски.
Шефот на српската дипломатија Никола Селаковиќ кој на свеченоста беше во својство на специјален претставник на претседателот на Србија , истакна дека светосавието , помеѓу се останато, е сето она што не поврзува со другите народи , со соседите , без разлика на верата или нацијата на која и припаѓаат.
Според неговите зборови, во морална и духовна смисла Свети Сава е недостижен пример за обичните луѓе, но е компас и светилник на васколикото српство, а сите завети на српскиот род, биле оние видовденско-косовски или орашачки, само борбата или за одбрана или за обнова била со светосавски завет.
– Се што српскиот народ има денеска на одреден начин има основа во светосавието. Нашата државност има корени во политичкото и дипломатското значење на Свети Сава. Нашата духовност почнува од Свети Сава. Нашата национална самосвест се движи во духовните пространства кои ги втемели Свети Сава”, објасни Селаковиќ.
Жељка Цвијановиќ, претседателка на Република Српска, во име на граѓаните на Република Српска и во свое име упати топли братски поздрави и благодарност на поддршката, разбирањето, и, како што рече, добрата соработка.
– Србите во Северна Македонија се автохтон народ присутен со векови, со богато културно и историско наследство. Средновековната, но, и современата историја на нашиот народ е непоимлива без Скопје, Куманово, Битола, Кајмакчалан, за што сведочат бројните споменици, преубавите цркви, манастири и вие, тука присутни, кои гордо го славите името на Свети Сава и својот национален празник, рече таа.
Таа додаде дека е уверена оти токму српската заедница во оваа земја може да биде онаа која што дополнително ќе ги поврзе институциите, уметниците, академската заедница, спортистите и многу други.
Активностите на делегациите од Република Србија и од Република Српска вклучија средба со претседателот Пендаровски а претседателката Цвијановиќ му беше гостринка и на градоначалникот на Куманово , Максим Димитриевски.
Од широкиот опус на она што претставува Свети Сава, би издвоиле неколку факти. Тој е основач на првата српска црква, позната како Пеќка патријаршија. Во 1 219 година успеал да издејствува од византискиот цар и од вселенскиот патријарх независност на Српската православна црква, а тој бил прогласен од страна на Цариградската патријаршија за прв српски архиепископ. Подоцна, заедно со својот татко, Свети Сава го подигнал манастирот Хиландар, како и многу други духовни светилишта цркви и манастири и училишта во денешна Србија.
(М.Т.)