Сен е Марн и квартот Венсен во Париз се двете места каде што терористите држат во заложништво повеќе лица.
Во Венсен едно лице упаднало во еден кoшер хипермаркет на плоштадот Венсен во Париз, кварт во кој живее голема еврејска заедница, и држи во заложништво пет лица помеѓу кои две жени и едно дете. Според последните информации има најмалку две жртви во кашер хипермаркетот.
Терористот кој е во продавницата е најверојатно авторот на вчерашното убиство на една млада припадничка на полицијата. Станува збор најверојатно за Амеди Кулибали, пријател со лицата кои го нападнаа сатиричниот магазин Шарли Ебдо.
Полицијата издаде потерница по него бидејќи нема стопостотна потврда дека токму тој се наоѓа во хипермаркетот. Потерница е издадена и по една негова пријателка за која постои сомневање дека соработувала во подготовката на овие убиствени акции.
Во Сен е Мар двајцата браќа Куаши кои убија 12 лица во средата наутро во редакцијата на Шарли Ебдо во Париз од синоќа се наоѓаат затворени во една печатница и најверојатно имаат со себе барем еден заложник.
Сведоците велат дека и таму ситуацијата е „замрзната“, сообраќајот и минувачите се стопирани, децата кои одат на училиште во близина не смеат да излезат од зградите а на жителите им е забрането да излегуваат надвор.
На двете места владее огромна тензија и страв. Повеќе десетици илијади пропадници на специјалните сили се мобилизирани и очигледно дека се во тек преговори со терористите.
Страв предизвикуваат и шпекулациите кои доаѓаат без прекин и информираат за нови пукотници низ цела Франција. Овие информации полицијата ги демантира но тие покажуваат дека Французите живеат во моментов во страв од нови напади.
Ситуацијата е без преседан не само во Франција туку и во цела Европа. Француските телевизии директно ги пренесуваат вестите кои доаѓаат од двете места и се чини дека цела Франција е во исчекување на расплетот.
Според аналитичарите на телевизиите, оваа ситуација не би смеела долго да трае бидејќи таа совршено им одговара на терористите. Со ова тие ставаат на знаење дека победуваат во оваа исклучителна кризна ситуација и од тие причини е потребно да се дојде до расплет.
Сепак многу вести нема бидејќи полицијата е во исчекување подготовена за напад. Но поради присуството на заложници тие не смеат да извршат напад и најверојатно преговараат со терористите.
Во Елизејската палата се одржува кризна средба од која исто така не доаѓаат многу информации.