Денеска во салата на Советот на Град Скопје се одржа комеморативна седница за пејачката, Есма Реџепова која три мандати беше советник во Град Скопје. текстописец, хуманитарка и советник во Град Скопје Есма Реџепова-Теодосиевска, која почина во саботата по кратко и тешко боледување на 73-годишна возраст.
Градоначалникот Коце Трајановски кажа дека со голема тага се простуваат со Есма Реџепова-Теодосиевска, голем човек и многу позитивна личност и хуманист.
– Есма беше наша кралица на ромската и на македонската музика, но и кралица на хуманоста и една од најголемите претставници на Македонија во светот. Со голема тага можам да кажам дека изгубивме голем човек и сакам да го изразам моето сочувство до нејзиното семејство – кажа Трајановски.
Директор на Ансамблот за народни игри и песни на Македонија „Танец“, Зоран Џорлев кажа дека Есма Реџепова-Теодосиевска беше врвен естраден уметник над 50 години, јубилеј што ретко кој може да го оствари.
Претседателот на Република Македонија, Ѓорге Иванов и гостите се потпишаа во книгата на жалост. Книгата на жалост ќе биде отворена за јавноста до среда, секој ден од 08:30 до 16:30 во холот на Салата на Советот на Град Скопје (ул. Илинден бр. 82, барака 13).
Есма Реџепова-Теодосиевска е родена во Скопје на 8 август 1943, а нејзината богата музичка кариера траеше над 55 години, во кои има одржано повеќе од осум илјади концерти, настапи на над 15 јазици, а има издадено над 60 албуми. Во септември 2013 година беше одликувана со титула „Национален уметник на Република Македонија“ за нејзиниот децениски придонес за афирмација на Република Македонија во светот. За мисијата на врвен уметник и културен амбасадор на државата, таа во 2010 година од претседателот на државата Ѓорге Иванов беше одликувана и со „Орден за заслуги на Македонија“.
Сочувство до семејството на Есма изрази и УНХЦР.
„Жал ни е за смртта на Реџепова, таа беше голем поддржувач на бегалците и почесен член на УНХЦР“, стои во соопштението од претставништвото на УНХЦР во Скопје.
