Да се разбереме. Основниот суд 1 ниту го затвори новинарот Томислав Кежаровски, ниту пак го ослободи. Тоа го стори власта. Иако, не би ја занемарувала светата улога на судиите. Конечно, самите се прогласија за Свет Суд, веројатно создаден по Божјата волја, што може едно да значи- се работи за божества, и тоа какви!
Ако мислите дека претерувам, видете го ве молам нивниот проглас: “Здружението на судии на Република Македонија ги осудува протестите против судските одлуки без разлика што е загарантирано правото на протест на секој, судските одлуки единствено можат да се преиспитуваат во судска инстанца и непримерно е да се попречува работата на судовите и притоа да се користи улична демократија за промена на одлуки која и тие кои протестираат се свесни дека не можат да ги издејствуваат надвор од институционалното и во судска инстанца преиспитување на судската одлука”.
Прочитавте добро. Велат- судските одлуки единствено можат да се преиспитуваат во судска инстанца. Судииве му доаѓаат нешто како вицот за тешката судбина на Путин, тогаш кога некој ќе се одважи да го критикува: “Откако умре Махатма Ганди, тој за жал нема со кого повеќе да зборува”.
Со оглед дека ова соопштение е потпишано од претседателот на Здружение на судии, Неговото Височество, Николчо Николовски, мора да е денес само сенка од онаа карпа од човек. Не е лесно сам со себе да зборува (не заборавајте, Ганди е одамна мртов), а да се слушаат гласови, што надвор преку прозорците од масата демонстранти, што во главата демоните, но и оние, телефонските инструкции од власта: за ослободување, за затворање, за малтретирање, за оставки, за крвожедност, за џелатство.
И Груевски нема со кого да зборува, ако овој факт му е утеха на пресветлиот судија Николовски. Затоа што, исто и него никој не смее да го критикува. Заради што сега на богот Николовски му се крвави рацете, но тоа е неговиот избор- кога ќе му понудат јаже, да бара свилено, за да се сочува нивото, онака како што сега крика, повикувајќи се на судски инстанци.
Знаете како- инаку воопшто не верувам дека на Николовски му се јавил лично Никола Груевски, што ја прави целата приказна за светецот Николовски пародично-патетична. Но, сите веќе знаеме- постојат разни информации дека од многуте бомби на Заев се и снимки со директни наредби за судски одлуки за политички затвореници од страна на власта, заради што Господин Господин Николовски допрва ќе праќа соопштенија, во кои нападно ќе има потреба да проговори и без да го обезбеди неопходното присуство на Ганди.
Досега, се беше по гандиевско сценарио- во случаеви кога умираше од досада и испраќаше на политичка робија се што беше уредно запишано во владиниот тефтер за македонскиот Голи Оток, се додека не настапи неговиот гнев, кога насети дека почнаа да се брануваат неговите спокојни денови на слугинство, додека тој салутира кога му ѕвони црвениот телефон.
Што да се прави- Г.Г судија Николовски многу добро знае дека кога доаѓа до некаква “судска инстанца” (омилениот термин на нашиот пресветол судија Николовски со кој сега се расфрла, небаре им се обраќа на ментално заостанати робови во синџири, им се извинувам на луѓето со пречки во развој), се суди и на наредбодавателите, но и на егзекуторите.
Така се одвиваат процесите и во земјата на Путин: ако му се јави некој директно да се распраша за нечија судбина, тој галантно одговара: “Како што ќе реши судот”. Заради ова, довчерашниот апостол, судијата Николовски, треба да биде загрижен. Многу загрижен човек.