Неврологот Арбен Таравари, ќе го советува министерот за здравство Арбен Таравари. Неврологот, Мерита Исмаили Марку и советник во кабинетот на министерот за здравство, ќе го советува министерот од областа од неврологијата.
Од документот до кој дојде НОВА се гледа и дека државниот секретар во министерството за здравство Владимир Милошев ќе го советува министерот од областа на Максилофацијалната хирургија. Ова се високите државни службеници во Министерството за здравство кои како Национални советници, очигледно ќе се советуваат сами себе.
Тие се дел од листата од 21 советник кои ги избрал министерот Таравари, а документот го потпишале и шефот на кабинетот Бесник Хамити и државниот секретар Владимир Милошев кој е на самата листа советници.
Секој од нив ќе зема по 12 000 денари месечно(200 евра)или вкупно од буџетот за нив ќе се одвојуваат околу 55 000 евра годишно. За разлика од сега, во време екс министерот Бујар Османи овие советници не добиваа финансиски надомест за тоа и министерот го советуваа на доброволна основа во секое време и секогаш кога било потребно.
Решението за именување на Национални советници на Министерството за здравство е донесено на 27 јули годинава, кога министерот Таравари немаше најавено дека ќе го напушти министерското место и ќе се кандидира за градоначалник. Сепак, и како градоначалник на него, како што се гледа од документот веќе му е обезбедено советничкото место.
Но, не само за вработените од кабинетот на Таравари, во медицинските кругови веќе се коментира и за дел од имињата на останатите советници од овој состав кои членуваат по разни комисии и управни одбори каде земаат големи хонорари.
Овие Национални советници се задолжени да ја следат имплементацијата на акциските планови по установите и да му доставуваат извештај на министерот за здравство.
Во Министерството за здравство објаснуваат дека Националните советници се избрани според нивното долгогодишно локално и меѓународно искуство и експертиза. Не го коментираат судирот на интереси на одбраните советници, заедно со министерот за здравство.