Верче Стојчевска, жената на која минатата недела и се слошило на работното место во фабриката „Дрекселмаер“, починала од мозочен инфаркт, односно од мозочен удар. Педесетгодишната жена од Велес не починала на работно место, како што се шпекулира во некои медиуми, туку на Клиниката за неврологија во Скопје. Таа немала мозочно крварење за да се интервенира оперативно, но зачепувањето од тромбот било толку силно што не го преживеала мозочниот удар.
Оваа информација за НОВА ја потврди нејзиниот сопруг, Зоран Стојчевски.Тој вели дека неговата сопруга имала променлив притисок кој најчесто не го чувствувала. Вели дека не знае што точно се случувало критичната ноќ и не може да коментира додека не добие официјални документи од менаџментот на фабриката. Сепак, потенцира дека доколку и било лошо, не постои сила која би можела да ја спречи за да му се јави на телефон за тој да преземе нешто.
„Доколку Верче ми се јавеше да ми каже дека не и добро, секако ќе превземев нешто. Но, немаше ништо посебно. Таа се жалеше на третата смена дека и е напорно, но тоа го кажуваше и на претходното работно место во друга фабрика. Сега емотивно можам да кажам се, но додека не ги добијам документите од фабриката, не можам ништо да коментирам“, изјави Стојчевски за НОВА.
Во моментот кога се случила несреќата тој и едната ќерка биле на одмор во Грција. Стојчевски е по професија информатичар, а неговата сопруга била правник, но откако останала без работа во велешки АД „Лозар“ по стечајот на фирмата, одлучила да ја прифати работата во германската фирма.
Стојчевски не знае дали трудовата инспекција извршила увид и што констатирала. Не е информиран што се случувало во мугрите тоа утро околу 0:3 часот, вели дека слуша разни шпекулации, но никој не дошол да му каже што е вистината.
„Се најави една нејзина колешка да ми раскаже што се случувало, но не дојде“, рече Стојчевски. Денеска, се навршуваат седум дена од нејзината смрт, па е зафатен околу поменот. Се уште не може да си дојде на себе од шокот по смртта на неговата сопруга.
Она што се шпекулира во некои медиуми е дека Верче и се пожалила на главоболка и мачнина на одговорната во третата смена.
Таа побарала да викнат брза помош или да си замине од работа со такси, но одговорната и порачала да остане некое време, можеби главоболката ќе и помине, во спротивно, ќе викнат лекар. Но, по половина час Верче паднала, а вработените се стрчале да и помогнат.Била повикана Итна медицинска помош, која прво ја однела во болницата во Кавадарци,а потоа била однесена на скопските клиники. Истиот ден, во вторникот вечерта откако и се влошила состојбата, таа починала.
Од компанијата „Дрекселмаер“велат дека здравјето на вработените им е приоритет. Токму затоа во сите фабрики во светот применувале високи стандарди за заштита и безбедност при работа. Таков е случајот и со фабриката во Кавадарци, се вели во соопштението од менаџментот на „Дрекселмаер“.
Амбуланта со лекар и осум медицински сестри и еден лекар им биле на располагање 24 часа на вработените.
„Во вторникот наутро на една од нашите вработени и се слошило. Веднаш бил повикан медицинскиот персонал кој дошол на лице место, а била повикана и Итната медицинска помош. Откако и е дадена прва помош била однесена во болницата во Кавадарци, каде и е дијагностициран мозочен удар, по што е пренесена во Клиничкиот центар во Скопје. Вработената за цело време била придружувана од страна на нејзината претпоставена. За жал, нашата вработена починала истиот ден на клиниката во Скопје“, се вели во соопштението.
Од таму објаснуваат дека семејството на починатата работничка ќе биде обештетно, односно ќе добие се што треба согласно законската регулатива.
За случајот реагираат од Здружението за социјална правда ,,Ленка“ и бараат случајот да се расветли.
„ЛЕНКА длабоко и човечки сочувствува со семејството и ќе направи се вистината за овој случај да излезе на виделина“, стои во дел од текстот на нивниот ФБ профил.
Многу сериозни обвинувања паѓаат на име на германската фабрика „Дрекселмаер“. Од тоа дека се работи под притисок, дека е напорно, како во концентрационен логор, дека вработени се бркаат од работа без објаснување.
Што од тоа е вистина, нема објаснување. Досега никој не излегол јавно да проговори, дури ниту тие што си заминале или биле избркани од работа.
Сопругот на Верче вели дека таму работат луѓе со различни квалификации, луѓе што не биле работно ангажирани долго време и тие не можат да се прилагодат германскиот режим на работа, кој се разликува македонското темпо на работење. Неговата сопруга освен напорот од третата смена не се жалела на друго. Сепак, Стојчевски има забелешка на фабриката бидејќи вработените немале колективно осигурување, кое чини многу поевтино од индивидуалното, а ќе ги заштити од несреќи при работа.
Од компанијата „Дрекселмаер“не одговорија дали вработените се колективно осигурани.
Нема објаснување и на пишувањата во некои медиуми кои доаѓаат од вработени или поранешни вработени во фабриката дека таму се работи под силен притисок, во услови кои вработените тешко ги издржуваат.