Долги се редовите за гласање речиси во секое гласачко место во Кичево. Уште од отворањето на гласачките кутии, за да се дојде на ред за гласање се чека од час па до два. Во меѓувреме, речиси целиот партиски врв од владејачката партија е присутен во Кичево.
“Излезноста е голема, проблеми засега нема, а и не очекуваме“, вели висок претставник на владејачката партија кој е присутен во Кичево за Нова.
Иако засега нема никакви инциденти и гласањето се одвива без проблеми, атмосферата во градот најдобро ја опишува еден од жителите.
“Овие избори се сфатија како живот или смрт. Да се гласа е најважно, а оние кои не гласаат нема да изгледаат добро во очите на своите комшии, роднини”, целата заедница, вели средовечниот жител кој сакаше да остане анонимен.
-Едноставно работата е таква, тие или ние. Албанец или Македонец.
Кога се исклучени камерите, работите се појасни. Сите ќе ви кажат дека најважно е градоначалникот да е “нивни човек”. Штом се вклучат снимачите, жителите на Кичево ќе го кажат она што сметаат дека од нив се очекува да го кажат.
“Важно е да чесен, да ни направи патишта, работни места. Не е важно дали е Албанец или Македонец,” вака јавно коментираат речиси сите со кои разговаравме.
Изгледот на градот, пак, зборува нешто друго. Знамиња во застрашувачки димензии, албански и македонски, висат на зградите во Кичево. Нема автомобил на кој не е закачено едно од знамињата. Со знаменцата се оди и на гласање. Едноставно, секое катче во градот има доволно етнонационалистички симболи за да се сфати дека во Кичево изборите навистина се сфатени како живот или смрт.