По реакциите што во јавноста ги предизвика изјавата на турската амбасадорка, денеска во МНР се одржала средба со претставници на Амбасадата на Турција, предводени од заменик шефот на мисијата, Мурат Сумер.

На средбата било изразено незадоволство поради неодамнешната неодмерена изјава на Амбасадорот на Република Турција во Македонија Тулин Кара, поврзано со класификацијата на учениците во училиштата на „Јахја Кемал“ како потенцијални терористи. Од страна на претставници на Амбасадата на Турција беше изразено жалење што оваа изјава на Амбасадорката Кара дадена во контекст  на свеченото отворање на училиште во Тетово, предизвикала реакции кои не се во рамките на основната порака која сакала да ја пренесе, за предупредување на ФЕТО организацијата во Македонија и во регионот, велат од МНР.

На промоцијата на Фондацијата „Мариф“, амбасадорката на Турција изјави:

„Апелирам до сите вас и до јавноста, дојдете, сите заедно, нашите деца да ги регистрираме во училиштата на Фондацијата ‘Мариф’. Доколку ние како родители не сакаме нашите деца во иднина да бидат терористи, треба да ги насочиме во училиштата на ‘Мариф’, бидејќи ‘Јахја Кемал’ не не претставува нас. Дојдете да се бориме против оваа терористичка оргнизација, на суштински начин, и тоа да не остане само на декларативно ниво“, рече Кара.

По ваквиот настап на амбасадорката, реагираа и од Министерството за образование. Од таму соопштија дека  работата на сите училишта во Македонија е подложна на контрола, како и дека од турската амбасада не добиле официјално барање за истрага или за евентуално затворање на некое училиште. „Децата слободно може да се запишуваат во сите училишта кои имаат согласност за работа од Министерството и кои работат во согласност со законските одредби, а такво е училиштето ‘Јахја Кемал’“ соопштија од МОН.