Најмалку 11 Палестинци, меѓу кои две деца и една жена, се убиени во синоќешниот израелски напад со беспилотно летало врз дом во северниот дел на Газа, велат палестински извори.
Палестинската новинска агенција Вафа објави дека израелските беспилотни летала испукале неколку проектили врз семејна куќа во областа Тел ал Затар, предизвикувајќи штета и повредувајќи неколку лица кои се наоѓале во домот.
Израелската армија вчера уби најмалку 45 Палестинци за време на засилените воздушни, артилериски напади и напади со беспилотни летала низ Појасот Газа, според палестински медицински извори, тимови за цивилна одбрана и очевидци.
Од почетокот на нападите во октомври 2023 година досега во Газа убиени се најмалку 51.000 Палестинци, од кои повеќето жени и деца.
Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант поради воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата за неговите постапки во енклавата.